प्रदीप ताजने
पातुर ग्रामीण प्रतिनिधी
आलेगाव :
सामाजिक बांधिलकी आणि मानवतेच्या भावनेतून सामाजिक कार्यकर्ते निलेश तोताराम कापकर यांनी दोन गरजू कुटुंबांना आर्थिक आणि वैद्यकीय मदतीचा हात दिला आहे. भीषण अपघातात एक पाय गमावलेल्या युवकाला ६,००० रुपये आणि पॅरालिसिसने ग्रस्त निराधार महिलेला ५,००० रुपयांची मदत त्यांनी केली आहे. याशिवाय रुग्णांना उपचारासाठी मोफत रुग्णवाहिका आणि डिझेलचा खर्चही पुरवला आहे.
भीषण अपघातात युवकाने गमावला पाय
लाखनवाडा (ता. खामगाव, जि. बुलढाणा) येथील मूळ रहिवासी असलेला २२ वर्षीय युवक लखन सुरेश गोरे हा सध्या आलेगाव येथे आपल्या मामाकडे राहत आहे. ८ एप्रिल रोजी लाखनवाडा येथील नॅशनल शाळेसमोर झालेल्या एका भीषण अपघातात लखन गंभीर जखमी झाला होता. या अपघातात त्याचा एक पाय डॉक्टरांना अर्धा कापावा लागला. ऐन उमेदीच्या वयात ओढवलेल्या या संकटामुळे गोरे कुटुंबावर आर्थिक आणि मानसिक दुःखाचा डोंगर कोसळला आहे.
निराधार महिलेला पॅरालिसिसचा झटका
आलेगाव येथील रहिवासी सुमन हिम्मतराव वानखडे यांची परिस्थिती अत्यंत गरिबीची आहे. त्यांना मुलगा नसून त्या पूर्णपणे निराधार आहेत. त्यातच त्यांना पॅरालिसिसचा (पक्षाघात) झटका आल्याने त्यांचा एक हात आणि एक पाय निकामी झाला आहे. उपचारासाठी त्यांच्याकडे कोणतेही साधन नव्हते.
लोकवर्गणीतून मोठी मदत; कृत्रिम पाय बसवणार
या दोन्ही कुटुंबांची हलाखीची परिस्थिती समजताच निलेश कापकर यांनी तातडीने पुढाकार घेतला. कापकर यांच्या आवाहनानंतर समाजातून लोकवर्गणी गोळा करण्यात आली. यामध्ये नागेश कंटाळे यांनी ५,००० रुपयांची मदत दिली, तर इतरही अनेक नागरिकांनी सढळ हस्ते मदत केली.
विशेष म्हणजे, लवकरच शिवसेना (शिंदे गट) पक्षाच्या वतीने या पीडित कुटुंबांची भेट घेतली जाईल. लखन गोरे या युवकाला पक्षाच्या माध्यमातून कृत्रिम पाय बसवून दिला जाईल आणि आणखी आर्थिक मदतही केली जाईल, अशी माहिती यावेळी देण्यात आली.
“सेवा हीच आमची ओळख”
“समाजातील गरजू, पीडित आणि संकटग्रस्त नागरिकांच्या मदतीसाठी आम्ही सदैव तत्पर आहोत. ‘सेवा हीच आमची ओळख’ या ब्रीदवाक्यानुसार भविष्यातही या कुटुंबांना सर्वतोपरी मदत केली जाईल,” असा विश्वास निलेश कापकर यांनी व्यक्त केला. कापकर यांच्या या संवेदनशील भूमिकेबद्दल आणि सामाजिक कार्याबद्दल आलेगाव व परिसरातील नागरिकांकडून त्यांचे विशेष कौतुक होत आहे.
