मराठा आरक्षण आंदोलनावरून परतताना इंदापूरच्या युवकाचा भीषण अपघातात मृत्यू; दोन सहकारी गंभीर जखमी
सारथी महाराष्ट्राचा शत्रुघ्न घाडगे प्रतिनिधी इंदापुर : मराठा आरक्षणाच्या मागणीसाठी जालना जिल्ह्यातील अंतरवाली सराटी येथे झालेल्या आंदोलनात सहभागी झाल्यानंतर इंदापूरकडे परतणाऱ्या युवकांच्या कारला भीषण अपघात झाला. या दुर्दैवी अपघातात इंदापूर तालुक्यातील युवकाचा जागीच मृत्यू झाला असून दोन जण गंभीर जखमी झाले आहेत. या घटनेमुळे इंदापूर तालुक्यासह मराठा समाजात शोककळा पसरली आहे.
मिळालेल्या माहितीनुसार, इंदापूर तालुक्यातील रामचंद्र शंकर जमदाडे हे आपल्या सहकाऱ्यांसह अंतरवाली सराटी येथील आंदोलनात सहभागी होऊन रात्री उशिरा कारने घरी परतत होते. बीड जिल्ह्यातील मांजरसुंबा परिसरात त्यांच्या कारला रस्त्याच्या कडेला उभ्या असलेल्या ट्रकने मागून जोरदार धडक दिली. धडक इतकी भीषण होती की रामचंद्र जमदाडे यांचा जागीच मृत्यू झाला.
या अपघातात त्यांच्यासोबत असलेले संतोष माने आणि विपीन मोरे हे गंभीर जखमी झाले असून त्यांच्यावर रुग्णालयात उपचार सुरू आहेत. घटनेची माहिती मिळताच स्थानिक मराठा समन्वयक आणि कार्यकर्त्यांनी तातडीने घटनास्थळी धाव घेत जखमींना उपचारासाठी दाखल केले.
मराठा आरक्षण आंदोलनासाठी गेलेल्या युवकाचा अशा दुर्दैवी अपघातात मृत्यू झाल्याने इंदापूर तालुक्यात हळहळ व्यक्त केली जात आहे. सामाजिक, राजकीय आणि मराठा समाजातील विविध स्तरांतून जमदाडे कुटुंबीयांप्रती शोकसंवेदना व्यक्त करण्यात येत असून जखमींच्या प्रकृतीत लवकर सुधारणा व्हावी अशी प्रार्थना केली जात आहे.
