शहादा,दि.31(का.प्र.)
शहादा पोलिसांच्या गुन्हे शोध पथकाने कौतुकास्पद कामगिरी केली आहे. शहादा बसस्टँड परिसरामधून चोरीस गेलेली मोटारसायकल अवघ्या काही दिवसांत शोधून काढत पोलिसांनी आरोपीला बेड्या ठोकल्या आहेत.
पोलिसांच्या या धडक कारवाईमुळे वाहनचोरांचे धाबे दणाणले असून, पोलिसांच्या तत्परतेचे सर्वत्र कौतुक होत आहे.दि.25 मे रोजी सायंकाळी शहादा पोलीस ठाण्याचे पोलीस निरीक्षक हेमंत पाटील यांना गुप्त बातमीदारामार्फत एक महत्त्वपूर्ण माहिती मिळाली. श्रीराम ट्रान्सपोर्टजवळील लोणखेडा बायपास रोड परिसरात एक तरुण संशयास्पदरीत्या लाल रंगाची बजाज प्लॅटिना मोटारसायकल घेऊन फिरत असल्याची ती माहिती होती.माहिती मिळताच पोलीस निरीक्षकांनी गुन्हे शोध पथकाला सतर्क केले. पथकातील पोलीस अंमलदार दिपक चौधरी, भगवान सावळे आणि कपिल मंडील यांनी तात्काळ घटनास्थळी धाव घेत संशयित इसमाला ताब्यात घेतले.
पोलिसांनी ताब्यात घेतल्यानंतर संशयिताने सुरुवातीला पोलिसांची दिशाभूल करण्याचा प्रयत्न करत उडवाउडवीची उत्तरे दिली. मात्र, पोलिसांनी आपला खाक्या दाखवताच तो पोपटासारखा बोलू लागला. अधिक कसून चौकशी केली असता त्याचे नाव धनराज पवार (वय २०, रा. मिरानगर, पाडळदा रोड, शहादा) असल्याचे समोर आले.संशयिताकडील मोटारसायकलची आणि कागदपत्रांची पडताळणी केली असता, वाहनावर लावलेला नंबर बनावट असल्याचे पोलिसांच्या लक्षात आले. पोलिसांनी हुशारीने गाडीचा चेसिस क्रमांक तपासून माहिती काढली. तेव्हा सदर मोटारसायकल ही भुषण संतोष पाटील (रा. विखरण, ता. शिरपूर, जि. धुळे) यांच्या मालकीची असल्याचे निष्पन्न झाले. ही मोटारसायकल 19 मे रोजी शहादा येथील लड्डू चहावाला बसस्टँड परिसरातून चोरीला गेली होती. याप्रकरणी शहादा पोलीस ठाण्यात भारतीय न्याय संहिता कलम 303(2) अन्वये गुन्हा दाखल करण्यात आला होता.तपासादरम्यान आरोपी धनराज पवार याने ती मोटारसायकल आपणच चोरल्याची कबुली दिली. पोलिसांनी त्याच्याकडून सुमारे 50 हजार रुपये किमतीची बजाज प्लॅटिना मोटारसायकल जप्त केली आहे. तपासात या वाहनाचा मूळ क्रमांक एमएच18बीडब्ल्यू1243 असल्याचे स्पष्ट झाले आहे.आरोपीला अटक करण्यात आली असून, या गुन्ह्याचा पुढील तपास पोलीस अंमलदार दिपक चौधरी करत आहेत. ही यशस्वी कारवाई पोलीस निरीक्षक हेमंत पाटील यांच्या मार्गदर्शनाखाली गुन्हे शोध पथकाने केली.वाहन चोरीच्या गुन्ह्यांचा उलगडा करण्यासाठी शहादा पोलिसांनी विशेष मोहीम हाती घेतली असून, नागरिकांना आपल्या परिसरात कोणतीही संशयास्पद हालचाल आढळल्यास तात्काळ पोलिसांशी संपर्क साधावा, असे आवाहन पोलीस प्रशासनातर्फे करण्यात आले आहे.
