खटाव | तालुका प्रतिनिधी
सातारा-सांगली स्थानिक स्वराज्य संस्था मतदारसंघाच्या आगामी विधान परिषद निवडणुकीच्या पार्श्वभूमीवर राजकीय घडामोडींना वेग आला असून राष्ट्रवादी काँग्रेस (शरदचंद्र पवार गट) कडून युवा नेते अभयसिंह जगताप यांना उमेदवारी अर्ज दाखल करण्याच्या सूचना देण्यात आल्याची माहिती समोर आली आहे. या घडामोडीमुळे या मतदारसंघात भाजप आणि राष्ट्रवादी काँग्रेस यांच्यात थेट लढत होण्याची शक्यता बळावली आहे.
राजकीय वर्तुळात सुरू असलेल्या चर्चेनुसार, राष्ट्रवादी काँग्रेस (शरदचंद्र पवार गट) पक्षश्रेष्ठींनी निवडणुकीच्या तयारीला वेग देत संभाव्य उमेदवारांच्या नावांवर अंतिम टप्प्यात विचार सुरू केला आहे. त्यामध्ये युवा नेतृत्व म्हणून ओळख असलेल्या अभयसिंह जगताप यांच्या नावाला विशेष महत्त्व प्राप्त होत असल्याचे सांगितले जात आहे.
अभयसिंह जगताप हे राष्ट्रवादी युवक काँग्रेसचे प्रदेश सरचिटणीस असून मान-खटाव परिसरातील प्रभावी आणि सक्रिय युवा नेतृत्व म्हणून त्यांची ओळख आहे. गेल्या काही वर्षांपासून त्यांनी विविध सामाजिक, शैक्षणिक आणि राजकीय उपक्रमांद्वारे ग्रामीण भागात मजबूत जनसंपर्क निर्माण केला आहे. त्यामुळे स्थानिक स्वराज्य संस्था मतदारसंघातील अनेक सदस्यांमध्ये त्यांचा प्रभाव असल्याचे मानले जाते.
पक्षाच्या वरिष्ठ पातळीवरून त्यांना निवडणुकीची तयारी करण्याचे संकेत मिळाल्याची चर्चा सुरू असून, त्यामुळे राष्ट्रवादीच्या संभाव्य उमेदवारांच्या यादीत त्यांच्या नावाची जोरदार चर्चा रंगू लागली आहे. पक्षाकडून अद्याप अधिकृत घोषणा झालेली नसली तरी त्यांच्या उमेदवारीबाबत कार्यकर्त्यांमध्ये उत्सुकता निर्माण झाली आहे.
दरम्यान, भाजपकडूनही या मतदारसंघासाठी जोरदार तयारी सुरू असल्याचे बोलले जात आहे. त्यामुळे निवडणुकीत भाजप आणि राष्ट्रवादी काँग्रेस (शरदचंद्र पवार गट) यांच्यात प्रतिष्ठेची लढत पाहायला मिळू शकते. स्थानिक स्वराज्य संस्थांच्या सदस्यांची संख्या, राजकीय समीकरणे आणि विविध पक्षांच्या ताकदीचा विचार करता ही निवडणूक अत्यंत चुरशीची होण्याची शक्यता राजकीय निरीक्षक व्यक्त करत आहेत.
सातारा आणि सांगली या दोन्ही जिल्ह्यांतील स्थानिक स्वराज्य संस्थांमधील बदलती राजकीय परिस्थिती, पक्षांतराची शक्यता आणि स्थानिक नेत्यांची भूमिका यामुळे या निवडणुकीकडे राज्याच्या राजकीय वर्तुळाचे लक्ष लागले आहे. आगामी काही दिवसांत राष्ट्रवादी काँग्रेसकडून उमेदवाराबाबत अधिकृत घोषणा झाल्यानंतर या निवडणुकीचे चित्र अधिक स्पष्ट होणार आहे.
सध्या तरी अभयसिंह जगताप यांच्या नावाची चर्चा राजकीय वर्तुळात जोर धरत असून, राष्ट्रवादी काँग्रेसकडून त्यांना उमेदवारी मिळाल्यास सातारा-सांगली स्थानिक स्वराज्य संस्था मतदारसंघातील निवडणूक अधिक रंगतदार होण्याची चिन्हे दिसत आहेत.
