ईश्वरपूर :
एका सामान्य गृहिणीपासून यशस्वी उद्योजिका आणि आता ‘उरूण-ईश्वरपूर बिझनेस फोरम’ (IBF) च्या उपाध्यक्षपदापर्यंतचा प्रवास… हा थक्क करणारा प्रवास आहे सौ. सुप्रिया अवधूत पेठकर यांचा! त्यांच्या याच जिद्दीची आणि समाजकार्याची दखल घेत, २०२६ ते २०२८ या कार्यकाळासाठी त्यांची आयबीएफच्या उपाध्यक्षपदी निवड करण्यात आली आहे.
शून्यातून विश्व निर्मितीचा प्रवास
२००५ मध्ये विवाहाची जबाबदारी आणि शिक्षण पूर्ण केल्यानंतर, सौ. सुप्रिया यांनी खऱ्या अर्थाने आपल्या स्वप्नांना पंख दिले. सासूबाई सौ. तेजादेवी पेठकर यांच्याकडून टेलरिंगचे धडे गिरवत त्यांनी व्यवसायाची सुरुवात केली. पती अवधूत पेठकर यांच्या खंबीर पाठिंब्यामुळे त्यांनी २००७ नंतर ‘क्वालिटी टेलरिंग’ या व्यवसायाला आधुनिकतेची जोड दिली. आज त्यांच्या ‘क्वालिटी टेलरिंग अँड फॅशन’ या संस्थेची व्याप्ती परदेशापर्यंत पोहोचली असून, अनेक हातांना त्यांनी रोजगार मिळवून दिला आहे.
तसेच त्या अनेक सामाजिक कार्यक्षेत्र मध्ये अग्रेसर असतात. अनेक सांस्कृतिक कार्यक्रम, आणि मुळात त्या स्वतः गायक आहेत.
त्यांना सामाजिक वारसा आणि नेतृत्वाचा ठसा
कै. प्रकाश गजानन पेठकर यांच्या सामाजिक कार्याचा वारसा पुढे नेण्याचे व्रत सौ. सुप्रिया यांनी २०१५ पासून स्वीकारले. २०२० ते २०२४ या काळात राष्ट्रवादी युवती संघटनेच्या उपाध्यक्ष म्हणून काम करताना त्यांनी महाविद्यालयीन युवतींच्या समस्या सोडवण्यासाठी आणि महिला सक्षमीकरणासाठी मोलाचे कार्य केले.
आय.बी.एफ.मध्ये महिलांना नवी दिशा
२०२१ मध्ये मा. प्रतीक (दादा) पाटील यांच्या मार्गदर्शनाखाली आयबीएफमध्ये प्रवेश केल्यानंतर, सौ. सुप्रिया यांनी महिला उद्योजिकांच्या संघटन उभारणीवर लक्ष केंद्रित केले. जिल्हा उद्योग केंद्राच्या सहकार्याने शासकीय योजना महिलांपर्यंत पोहोचवण्यात त्यांनी पुढाकार घेतला. त्यांच्या या कार्याची दखल घेत आयबीएफने आता त्यांना उपाध्यक्षपदाची धुरा सोपवली आहे.
उद्योजिकांसाठी नवपर्वाचा आरंभ
आय.बी.एफ च्या नूतन कार्यकारिणीत शहाजी पाटील (अध्यक्ष), स्वरूप साळुंखे (उपाध्यक्ष) आणि सौ. सुप्रिया पेठकर (उपाध्यक्ष) यांची निवड झाली आहे. सौ. सुप्रिया यांच्या निवडीमुळे महिला उद्योजिकांना संघटनेत एक हक्काचा आणि प्रभावी आवाज मिळाला असून, त्यांच्या कार्यामुळे परिसरातील महिला उद्योजकांमध्ये उत्साहाचे वातावरण आहे.
व्यवसाय, कुटुंब आणि समाजकार्य यांचा उत्तम समतोल साधणाऱ्या सौ. सुप्रिया पेठकर यांचे सर्वस्तरातून अभिनंदन होत आहे.
