विखरणी, ता. येवला | प्रतिनिधी
लक्ष्मी इंग्लिश मिडीयम पब्लिक स्कूल अँड ज्युनियर कॉलेज, विखरणी येथे लोकमाता राजमाता पुण्यश्लोक अहिल्यामाता होळकर यांची ३०१ वी जयंती मोठ्या उत्साहात, भक्तिभावाने आणि प्रेरणादायी वातावरणात साजरी करण्यात आली. याच वेळी संस्थेत आयोजित करण्यात आलेल्या स्पोकन इंग्लिश क्लासच्या विद्यार्थ्यांचा निरोप समारंभही उत्साहपूर्ण वातावरणात पार पडला. या दुहेरी कार्यक्रमामुळे शाळा परिसरात आनंदाचे आणि प्रेरणेचे वातावरण निर्माण झाले होते.
कार्यक्रमाच्या अध्यक्षस्थानी संस्थेचे अध्यक्ष डॉ. मोहनजी शेलार सर होते. यावेळी संस्थेच्या सचिव ज्योती शेलार मॅडम, प्राचार्य भास्कर खेमनर सर, भीमराज आवारे सर, शिक्षकवृंद, पालकवर्ग तसेच मोठ्या संख्येने विद्यार्थी उपस्थित होते.
कार्यक्रमाची सुरुवात राजमाता पुण्यश्लोक अहिल्यामाता होळकर यांच्या प्रतिमेचे पूजन व पुष्पहार अर्पण करून करण्यात आली. उपस्थित मान्यवरांनी अहिल्यामातांच्या प्रतिमेस अभिवादन करून त्यांच्या कार्याला विनम्र आदरांजली वाहिली. यावेळी वक्त्यांनी अहिल्यामाता होळकर यांच्या न्यायप्रिय, लोककल्याणकारी, धर्मनिष्ठ आणि समाजहिताच्या कार्याचा गौरवपूर्ण आढावा घेतला.
मार्गदर्शन करताना संस्थेचे अध्यक्ष डॉ. मोहनजी शेलार यांनी विद्यार्थ्यांना अहिल्यामातांच्या जीवनातून प्रेरणा घेण्याचे आवाहन केले. त्यांनी सांगितले की, अहिल्यामाता होळकर यांनी आपल्या दूरदृष्टी, प्रशासन कौशल्य आणि लोकहिताच्या कार्यातून आदर्श राज्यकारभाराचा आदर्श निर्माण केला. त्यांचे विचार आणि कार्य आजच्या पिढीसाठी प्रेरणादायी आहेत. तसेच त्यांनी आधुनिक युगातील इंग्रजी भाषेचे महत्त्व अधोरेखित करत विद्यार्थ्यांनी संवादकौशल्य विकसित करण्यासाठी स्पोकन इंग्लिशचे ज्ञान आत्मसात करणे आवश्यक असल्याचे सांगितले.
कार्यक्रमाचे प्रास्ताविक प्राचार्य भास्कर खेमनर सर यांनी केले. त्यांनी संस्थेत राबविण्यात येणाऱ्या विविध शैक्षणिक, सांस्कृतिक आणि व्यक्तिमत्त्व विकासाच्या उपक्रमांची माहिती देत विद्यार्थ्यांना शैक्षणिक प्रगतीबरोबरच सर्वांगीsण विकासासाठी प्रयत्नशील राहण्याचा संदेश दिला.
स्पोकन इंग्लिश क्लासच्या विद्यार्थिनी रिया पगारे हिने प्रभावी आणि आत्मविश्वासपूर्ण सूत्रसंचालन करून कार्यक्रमात रंगत आणली. यावेळी स्पोकन इंग्लिश क्लासमधील विद्यार्थ्यांनी आपले मनोगत व्यक्त करत प्रशिक्षणादरम्यान मिळालेल्या अनुभवांची माहिती दिली. शिक्षकांनी दिलेल्या मार्गदर्शनामुळे इंग्रजी भाषेतील आत्मविश्वास वाढल्याचे सांगत त्यांनी संस्थेबद्दल कृतज्ञता व्यक्त केली.
निरोप समारंभाच्या निमित्ताने विद्यार्थ्यांना उज्ज्वल भविष्यासाठी शुभेच्छा देण्यात आल्या. शिक्षकांनी विद्यार्थ्यांना जीवनातील प्रत्येक टप्प्यावर आत्मविश्वास, मेहनत आणि सकारात्मक दृष्टिकोन ठेवण्याचा सल्ला दिला.
कार्यक्रमाच्या शेवटी भीमराज आवारे सर यांनी उपस्थित मान्यवर, पालक, शिक्षक, विद्यार्थी आणि कार्यक्रमाच्या यशस्वी आयोजनासाठी परिश्रम घेणाऱ्या सर्वांचे आभार मानले. कार्यक्रम यशस्वी करण्यासाठी शिक्षक व शिक्षकेतर कर्मचाऱ्यांनी विशेष परिश्रम घेतले.
राजमाता पुण्यश्लोक अहिल्यामाता होळकर यांच्या ३०१ व्या जयंतीनिमित्त त्यांच्या महान कार्याचा प्रेरणादायी वारसा विद्यार्थ्यांपर्यंत पोहोचविण्याबरोबरच स्पोकन इंग्लिश क्लासच्या विद्यार्थ्यांचा निरोप समारंभ संस्मरणीय वातावरणात पार पडला. या कार्यक्रमातून विद्यार्थ्यांना इतिहास, संस्कार आणि आधुनिक शिक्षण यांचा सुंदर संगम अनुभवायला मिळाला.
