पनवेल | प्रतिनिधी
पनवेल महानगरपालिका हद्दीतील काही स्मशानभूमींमध्ये अंत्यसंस्कारासाठी येणाऱ्या नागरिकांची आर्थिक लूट होत असल्याचा गंभीर आरोप एका जागरूक नागरिकाने केला आहे. यासंदर्भात प्रशासनाने तातडीने चौकशी करून दोषींवर कारवाई करावी, अशी मागणी करण्यात आली आहे.
निवेदनानुसार, स्मशानभूमीतील लाकूड पुरवठ्याच्या कंत्राटामध्ये नातेवाईकशाही असल्याचा आरोप करण्यात आला आहे. तसेच अग्निदहन यंत्रणा कार्यरत असतानाही ती बंद असल्याचे सांगून नागरिकांना लाकूड खरेदी करण्यास भाग पाडले जात असल्याचे म्हटले आहे.
अंत्यसंस्कारासाठी आवश्यक साहित्याच्या नावाखाली अवाजवी शुल्क आकारले जात असल्याचा आरोपही करण्यात आला आहे. लाकूड, डिझेल तसेच इतर खर्चाच्या नावाखाली शोकाकुल कुटुंबांकडून अतिरिक्त रक्कम घेतली जात असल्याची तक्रार निवेदनात नमूद करण्यात आली आहे.
याशिवाय अंत्यसंस्कारासाठी आणलेल्या साहित्याचा गैरवापर केला जात असल्याचा तसेच पर्यावरणीय नियमांचे उल्लंघन होत असल्याचाही आरोप करण्यात आला आहे. स्मशानभूमीत सीसीटीव्ही यंत्रणा नसल्यामुळे अशा प्रकारांना आळा बसत नसल्याचे नागरिकांचे म्हणणे आहे.
या पार्श्वभूमीवर संबंधित कर्मचाऱ्यांची बदली करणे, जबाबदार अधिकाऱ्यांवर चौकशी करून आवश्यक कारवाई करणे आणि पारदर्शक कार्यपद्धतीसाठी नवीन यंत्रणा नियुक्त करणे, अशा प्रमुख मागण्या करण्यात आल्या आहेत.
दरम्यान, या सर्व आरोपांबाबत महानगरपालिका प्रशासन किंवा संबंधित कंत्राटदारांची अधिकृत प्रतिक्रिया अद्याप प्राप्त झालेली नाही. प्रशासनाने या प्रकरणाची निष्पक्ष चौकशी करून सत्य परिस्थिती जनतेसमोर आणावी, अशी मागणी नागरिकांकडून होत आहे.
