पुणे | प्रतिनिधी
पुण्यातील नोबल हॉस्पिटल अँड रिसर्च सेंटरने अत्याधुनिक वैद्यकीय तंत्रज्ञानाचा वापर करून हृदय शस्त्रक्रिया क्षेत्रात एक महत्त्वपूर्ण टप्पा गाठला आहे. रुग्णालयातील तज्ज्ञ डॉक्टरांच्या पथकाने रोबोटिक तंत्रज्ञानाच्या सहाय्याने हृदयातील मिक्सोमा ही गाठ यशस्वीरित्या काढून टाकण्याची गुंतागुंतीची शस्त्रक्रिया पूर्ण केली.
मिळालेल्या माहितीनुसार, ५५ वर्षीय महिला रुग्णाच्या हृदयाच्या डाव्या कप्प्यात मिक्सोमा प्रकारची गाठ आढळून आली होती. ही गाठ कर्करोगजन्य नसली तरी भविष्यात गंभीर आरोग्य समस्या निर्माण होण्याची शक्यता असल्याने शस्त्रक्रिया आवश्यक ठरली होती.
पारंपरिक पद्धतीत अशा प्रकारच्या शस्त्रक्रियेसाठी छाती उघडावी लागते. मात्र, या वेळी आधुनिक रोबोटिक प्रणालीच्या मदतीने शरीरावर मोठी जखम न करता लहान छिद्रांद्वारे शस्त्रक्रिया करण्यात आली. त्यामुळे रुग्णाला कमी वेदना, कमी रक्तस्त्राव आणि जलद पुनर्वसनाचा लाभ मिळाला.
शस्त्रक्रियेदरम्यान अत्याधुनिक त्रिमितीय (3D) दृश्य प्रणालीचा वापर करून डॉक्टरांनी हृदयातील गाठ अचूकपणे काढून टाकली. संपूर्ण प्रक्रिया अत्यंत सुरक्षित आणि नियंत्रित पद्धतीने पार पडल्याची माहिती रुग्णालय प्रशासनाने दिली.
या शस्त्रक्रियेचे नेतृत्व वरिष्ठ कार्डियाक सर्जन डॉ. वैशाली कपाडे यांनी केले. त्यांना डॉ. आशिष पेंडकर, डॉ. अनिरुद्ध वेकणे, डॉ. एन. जावद, डॉ. सम्राट मदनाईक आणि डॉ. परिती दीक्षित यांचे मोलाचे सहकार्य लाभले.
या यशस्वी कामगिरीबद्दल प्रतिक्रिया व्यक्त करताना नोबल हॉस्पिटलचे मुख्य कार्यकारी अधिकारी डॉ. संजय पठारे यांनी संपूर्ण वैद्यकीय पथकाचे अभिनंदन केले. अत्याधुनिक रोबोटिक तंत्रज्ञानाच्या साहाय्याने रुग्णांना अधिक सुरक्षित, प्रभावी आणि दर्जेदार आरोग्यसेवा उपलब्ध करून देण्याचा संस्थेचा प्रयत्न कायम राहील, असे त्यांनी सांगितले.
या यशस्वी शस्त्रक्रियेमुळे पुणे शहरासह महाराष्ट्रातील आरोग्य क्षेत्रात रोबोटिक हृदय शस्त्रक्रियेच्या नव्या पर्वाची सुरुवात झाल्याची भावना वैद्यकीय क्षेत्रातून व्यक्त होत आहे.
