पुणे | प्रतिनिधी | दि. २ जून २०२६
पुणे-सोलापूर महामार्गावरील कदमवाकवस्ती येथे भरधाव आणि बेदरकारपणे धावणाऱ्या डंपरच्या धडकेत एका ५६ वर्षीय पेंटर व्यवसायिकाचा जागीच मृत्यू झाल्याची दुर्दैवी घटना मंगळवारी सकाळी घडली. या अपघातामुळे परिसरात हळहळ व्यक्त होत असून नागरिकांमध्ये तीव्र संतापाची लाट पसरली आहे.
मिळालेल्या माहितीनुसार, हवेली तालुक्यातील कदमवाकवस्ती ग्रामपंचायत हद्दीतील कवडीपाट परिसरात सकाळी साडेदहा वाजण्याच्या सुमारास हा भीषण अपघात झाला. भरधाव वेगाने येणाऱ्या डंपरने दुचाकीस्वाराला जोरदार धडक दिली. धडक इतकी भीषण होती की दुचाकीस्वार डंपरच्या चाकाखाली सापडून त्यांचा जागीच मृत्यू झाला.
या अपघातात मृत्यू झालेल्या व्यक्तीचे नाव मोहन जगन्नाथ माळवदकर (वय ५६, रा. गुजरवस्ती, कवडीपाट, कदमवाकवस्ती, ता. हवेली) असे आहे. ते व्यवसायाने पेंटर होते.
अपघातानंतर धक्कादायक बाब समोर आली असून संबंधित डंपरच्या मागील बाजूस कोणतीही नंबर प्लेट नसल्याचे निदर्शनास आले आहे. त्यामुळे वाहनाची ओळख पटविणे आणि चालकाचा शोध घेणे यामध्ये अडचणी निर्माण झाल्या आहेत. या प्रकारामुळे पोलिस आणि आरटीओ प्रशासनाच्या कार्यपद्धतीवर प्रश्नचिन्ह उपस्थित होत असून नागरिकांकडून संताप व्यक्त केला जात आहे.
घटनेची माहिती मिळताच पोलिसांनी घटनास्थळी धाव घेत पंचनामा केला. मृतदेह शवविच्छेदनासाठी पाठविण्यात आला असून अपघातप्रकरणी पुढील तपास सुरू आहे.
स्थानिक नागरिकांनी महामार्गावरील अवजड वाहनांच्या वेगावर नियंत्रण ठेवण्याबरोबरच नंबर प्लेट नसलेल्या वाहनांवर कठोर कारवाई करण्याची मागणी प्रशासनाकडे केली आहे.
