पुणे | प्रतिनिधी :
2 जून 2026
खडकवासला परिसरातील कालव्यात बेपत्ता झालेल्या जवानाच्या शोधासाठी सुरू असलेल्या मोहिमेला सोमवारी दुर्दैवी वळण मिळाले. एनडीए व स्थानिक प्रशासनाच्या संयुक्त शोधमोहीमेदरम्यान जवानाचा मृतदेह नांदेड फाटा परिसरात आढळून आला. या घटनेमुळे परिसरात हळहळ व्यक्त होत आहे.
मिळालेल्या माहितीनुसार, जवान सर्जंट राजेश वर्मा हे कालव्यात बेपत्ता झाल्यानंतर विविध बचाव पथकांकडून व्यापक शोधमोहीम राबविण्यात येत होती. अखेर सोमवारी सायंकाळी चारच्या सुमारास नांदेड फाटा परिसरात त्यांचा मृतदेह सापडला. या प्रकरणी नांदेड सिटी पोलिस ठाण्यात अकस्मात मृत्यूची नोंद करण्यात आली असून पुढील तपास सुरू आहे.
दरम्यान, शोधमोहीम सुरू असतानाच कालव्यातील पाण्याच्या प्रवाहात एक महिला वाहून जात असल्याचे एनडीएच्या जवानांच्या निदर्शनास आले. प्रसंगावधान राखत पीएमआरडीएफ आणि अग्निशमन दलाच्या जवानांनी तातडीने बचावकार्य करत संबंधित महिलेला सुरक्षित बाहेर काढले.
त्यानंतर महिलेला एनडीएच्या एअर फोर्स कर्मचाऱ्यांच्या ताब्यात देण्यात आले. प्राथमिक उपचारांनंतर तिला पुढील उपचारांसाठी ससून रुग्णालयात दाखल करण्यात आले असल्याची माहिती प्रशासनाकडून देण्यात आली.
या घटनेमुळे एकीकडे जवानाच्या मृत्यूबद्दल शोक व्यक्त केला जात असताना, दुसरीकडे जवानांच्या तत्परतेमुळे एका महिलेचा जीव वाचल्याने त्यांच्या धाडसाचे सर्वत्र कौतुक होत आहे.
