नेकनूर | प्रतिनिधी
भारत निवडणूक आयोगाच्या निर्देशानुसार सुरू असलेल्या स्पेशल इंटेन्सिव्ह रिव्हिजन (SIR) अर्थात विशेष मतदार यादी पुनरीक्षण मोहिमेच्या अनुषंगाने गुरुवारी (दि. ९ जुलै) ग्रामपंचायत कार्यालय, नेकनूर येथे बूथ लेव्हल ऑफिसर्स (बीएलओ) यांची आढावा बैठक उत्साहात पार पडली.
बैठकीला तलाठी शरद इतापे, सरपंच पती सुंदर लांडगे, उपसरपंच सचिन शिंदे, ग्रामपंचायत सदस्य सय्यद साजेद अली, शिवाजी शिंदे, अर्शद अन्वर, अशोक शिंदे, सय्यद रिजवान, रहीम भाई, विलास राऊत तसेच अन्य मान्यवर उपस्थित होते.
यावेळी विशेष मतदार यादी पुनरीक्षणाचे काम अधिक प्रभावी, पारदर्शक व निर्धारित वेळेत पूर्ण करण्याबाबत सविस्तर मार्गदर्शन करण्यात आले. प्रत्येक पात्र नागरिकाचे नाव मतदार यादीत समाविष्ट करणे, अपात्र व मृत मतदारांची नोंद अद्ययावत करणे, स्थलांतरित मतदारांची माहिती पडताळणे तसेच आवश्यक कागदपत्रांची अचूक तपासणी करण्याच्या सूचना अधिकाऱ्यांनी बीएलओंना दिल्या.
बैठकीत प्रत्येक बीएलओने आपल्या मतदान केंद्राच्या कार्यक्षेत्रातील सुरू असलेल्या कामाचा आढावा सादर केला. मतदारांकडून आवश्यक कागदपत्रे, पासपोर्ट आकाराचे छायाचित्र व इतर आवश्यक माहिती वेळेत संकलित करून निर्धारित मुदतीत पुनरीक्षणाचे काम पूर्ण करण्याच्या सूचनाही यावेळी देण्यात आल्या.
या विशेष पुनरीक्षण मोहिमेमुळे मतदार यादी अधिक अचूक, अद्ययावत आणि सर्वसमावेशक होण्यास मदत होणार असून, पात्र नागरिकांनी आवश्यक कागदपत्रांसह बीएलओंना सहकार्य करण्याचे आवाहन करण्यात आले.
