कुरुंदवाड | प्रतिनिधी
कुरुंदवाड पोलीस ठाण्याच्या हद्दीत पोलिसांनी तीन वेगवेगळ्या ठिकाणी धडक कारवाई करत मटका जुगार, विनापरवाना देशी दारू विक्री आणि सुगंधित तंबाखू (मावा) विक्री करणाऱ्या तिघांविरुद्ध गुन्हे दाखल केले. या कारवाईत एकूण २० हजार रुपयांहून अधिक किमतीचा मुद्देमाल जप्त करण्यात आला.
पहिल्या कारवाईत आलास (ता. शिरोळ) येथील जुगुळ रस्त्यावरील न्यू पॅलेस बिअर बारच्या परिसरात उघड्यावर पैसे घेऊन ‘कल्याण मटका’ जुगार चालवित असलेल्या रवि लिंगाप्पा चलवादी (वय ३९, रा. नृसिंहवाडी, ता. शिरोळ) याला पोलिसांनी रंगेहात पकडले. त्याच्याकडून २ हजार ८३० रुपये रोख, मटक्याचे आकडे लिहिलेला कागद, बॉलपेन आणि १४ हजार रुपये किमतीचा मोबाईल असा एकूण १६ हजार ८३० रुपयांचा मुद्देमाल जप्त करण्यात आला.
दुसऱ्या कारवाईत नवे दानवाड (ता. शिरोळ) येथील एसटी स्टँडच्या पाठीमागील पाण्याच्या टाकीजवळ राजू श्रीमंत कांबळे (वय ३९, रा. बेरड गल्ली, दानवाड) हा विनापरवाना देशी दारूची विक्री करताना आढळून आला. त्याच्याकडून ‘रेठरे संत्रा’ कंपनीच्या देशी दारूच्या ६८ बाटल्या असा २ हजार ७२० रुपयांचा मुद्देमाल जप्त करण्यात आला.
तिसऱ्या कारवाईत शिवनाकवाडी (ता. शिरोळ) येथील हॉटेल बॉर्डर धाबा परिसरातील ‘राधे पानशॉप’ येथे वैभव हंबीरराव पाटील (वय ३५, रा. शिरदवाड) हा सुगंधित तंबाखू मिश्रित मावा विक्री करताना आढळला. त्याच्याकडून ३० माव्याच्या पुड्या असा ६०० रुपयांचा मुद्देमाल जप्त करण्यात आला.
या तिन्ही प्रकरणांमध्ये संबंधित आरोपींविरुद्ध विविध कायद्यांनुसार गुन्हे दाखल करण्यात आले असून पुढील तपास कुरुंदवाड पोलीस करीत आहेत.
