मारेगाव | प्रतिनिधी :
मारेगाव शहरातील एका भंगार दुकानावर मारेगाव पोलीस ठाण्याचे पोलीस निरीक्षक सागर दानडे यांच्या नेतृत्वाखाली छापा टाकून कारवाई करण्यात आल्याची माहिती समोर आली आहे. या कारवाईदरम्यान संशयास्पद स्वरूपाचे साहित्य जप्त करण्यात आले असून, त्याची पडताळणी सुरू आहे.
प्राथमिक माहितीनुसार, भंगार दुकानाच्या तपासणीत वीज वाहक तारा (केबल), लोखंडी साहित्य तसेच मोटारसायकलींचे विविध सुटे भाग आढळून आले. यानंतर भंगार व्यावसायिकाच्या निवासस्थानीही पोलिसांनी तपासणी केली असता तेथे मोटारसायकलींचे चेसिस (Chassis) आढळल्याची माहिती आहे. संबंधित साहित्य पोलिसांनी ताब्यात घेतले असून त्याची कायदेशीर पडताळणी सुरू आहे.
ही कारवाई यवतमाळ जिल्हा पोलीस अधीक्षक कुमार चिंथा यांच्या मार्गदर्शनाखाली राबविण्यात आलेल्या विशेष मोहिमेअंतर्गत करण्यात आली. या कारवाईत पोलीस निरीक्षक सागर दानडे यांच्या नेतृत्वाखाली बिट जमादार जुनेद शेख, शंकर बारेकर, इसनकर तसेच अन्य पोलीस कर्मचाऱ्यांनी सहभाग घेतला.
जप्त करण्यात आलेल्या साहित्याचा संबंध चोरीच्या गुन्ह्यांशी आहे का, अथवा ते कायदेशीररीत्या खरेदी करण्यात आले होते का, याची तपासणी पोलीस करत आहेत. तपास पूर्ण झाल्यानंतरच याबाबत अधिकृत निष्कर्ष स्पष्ट होणार आहे.
दरम्यान, अशा प्रकारच्या कारवायांमुळे चोरीस गेलेल्या मालाचा शोध लागण्यास मदत होऊ शकते, अशी अपेक्षा तालुक्यातील नागरिकांनी व्यक्त केली आहे.
