प्रतिनिधी = श्री. गणेश ठाकरे, लासलगाव
सामाजिक बांधिलकी जपत पंचायत समिती चांदवड आणि ग्रामपंचायत अधिकारी संघटना (DNE- 136) यांच्या संयुक्त विद्यमाने नुकतेच पंचायत समिती कार्यालयात एका भव्य रक्तदान शिबिराचे आयोजन करण्यात आले होते. या शिबिराला नागरिकांसह कर्मचाऱ्यांचा उत्स्फूर्त प्रतिसाद मिळाला.
शिबिराचे उद्घाटन व उपस्थितांना मार्गदर्शन करताना चांदवडचे गटविकास अधिकारी (BDO) मच्छिंद्र साबळे यांनी रक्तदानाचे वैज्ञानिक महत्त्व पटवून दिले. रक्तदान केल्याने शरीराला होणारे फायदे आणि त्याचे सामाजिक महत्त्व समजावून सांगत त्यांनी जास्तीत जास्त दात्यांनी पुढे येण्याचे आवाहन केले. त्यांच्या या आवाहनाला प्रतिसाद देत महिलांसह एकूण ३७ रक्तदात्यांनी यावेळी रक्तदान केले.
या सामाजिक उपक्रमासाठी जिल्हा शासकीय रुग्णालय, नाशिक येथील जनसंपर्क अधिकारी (PRO) मंगेश राठोड, पूजा राठोड आणि त्यांच्या संपूर्ण वैद्यकीय पथकाचे मोलाचे सहकार्य लाभले.
याप्रसंगी सहाय्यक गटविकास अधिकारी छोटू थोरात, विस्तार अधिकारी सुनील बच्छाव, दिनकर कुमावत, किशोर लोहार, संघटनेचे सर्व पदाधिकारी, आरोग्य कर्मचारी तसेच विविध गावांतील सरपंच व प्रशासक मोठ्या संख्येने उपस्थित होते.
हा कार्यक्रम यशस्वी करण्यासाठी तालुका व्यवस्थापक किरण शिंदे यांनी विशेष परिश्रम घेतले. तसेच पंचायत समितीच्या सर्व अधिकारी व कर्मचाऱ्यांनी या उपक्रमासाठी मोलाचे सहकार्य केले.
