प्रतिनिधी : सतीश नेवारे
सारथी महाराष्ट्राचा न्यूज
दि. २ : जिल्हा समाज कल्याण अधिकारी, जिल्हा परिषद चंद्रपूर यांच्या कार्यालयामार्फत अनुसूचित जातीच्या विद्यार्थ्यांसाठी राबविण्यात येणाऱ्या मॅट्रिकपूर्व शिष्यवृत्ती योजनांचे ऑनलाइन अर्ज भरण्याची प्रक्रिया सुरू करण्यात आली आहे. शैक्षणिक वर्ष २०२६-२७ साठी महाडीबीटी 2.0 या नव्या प्रणालीद्वारे शिष्यवृत्तीची रक्कम थेट विद्यार्थ्यांच्या आधार-संलग्न बँक खात्यात जमा करण्यात येणार आहे. त्यामुळे विद्यार्थ्यांनी अर्जामध्ये अचूक माहिती भरावी, असे आवाहन करण्यात आले आहे.
महाडीबीटी 2.0 पोर्टलद्वारे साफसफाई व आरोग्यास धोकादायक क्षेत्रात काम करणाऱ्या पालकांच्या पाल्यांना मॅट्रिकपूर्व शिष्यवृत्ती, इयत्ता ९ वी ते १० वी मॅट्रिकपूर्व शिष्यवृत्ती (अनुसूचित जाती), महर्षी विठ्ठल रामजी शिंदे परीक्षा फी/शिक्षण फी योजना, इयत्ता ५ वी ते १० वीमध्ये शिकणाऱ्या मुलींना सावित्रीबाई शिष्यवृत्ती तसेच माध्यमिक शाळेत शिकणाऱ्या विद्यार्थ्यांना गुणवत्ता शिष्यवृत्ती या योजनांचे अर्ज ऑनलाइन भरता येणार आहेत.
शाळांच्या मुख्याध्यापकांनी संबंधित शिष्यवृत्तीसाठी आवश्यक कागदपत्रे विद्यार्थ्यांकडून जमा करून त्यांची पडताळणी करावी. यामध्ये जात प्रमाणपत्र, बीपीएल दाखला, वार्षिक उत्पन्न प्रमाणपत्र तसेच संबंधित योजनेसाठी आवश्यक कागदपत्रांचा समावेश आहे. कागदपत्रांची तपासणी करूनच पोर्टलवर माहिती काळजीपूर्वक भरावी, असे कार्यालयाने सूचित केले आहे.
महाडीबीटी 2.0 पोर्टलवर शाळांनी नोंदणीसाठी mahadbt2.maharashtra.gov.in या संकेतस्थळाचा वापर करावा. मागील वर्षी शासनाकडून उपलब्ध करून देण्यात आलेल्या युजरनेमचाच वापर करावा. शाळेच्या युजरनेममध्ये ‘Principal’ ऐवजी संबंधित शाळेचा यू-डायस क्रमांक वापरण्याची सूचना करण्यात आली आहे. आधार-संलग्न मोबाईल क्रमांकावर ओटीपी प्राप्त झाल्यानंतर संकेतशब्द बदलण्याची प्रक्रिया पूर्ण करावी. जुन्या प्रोफाइलवर आधार क्रमांक अपडेट केलेल्या वापरकर्त्यांना ओटीपी प्राप्त होणार असल्याचेही कळविण्यात आले आहे.
अधिक माहितीसाठी ०२२-४९१५०८०० / १८००१०२५३९९ या क्रमांकावर संपर्क साधता येईल. तसेच helpdesk@mahadbt.gov.in या ई-मेलवर संपर्क करता येणार आहे. तांत्रिक किंवा प्रशासकीय तक्रारींसाठी संबंधित लॉगिनमधून स्क्रीनशॉटसह तक्रार नोंदविण्याची सुविधा उपलब्ध असल्याचे जिल्हा समाज कल्याण अधिकारी कार्यालयाने कळविले आहे.
