पालवी हॉटेलजवळील पुलाचे बांधकाम; ३१ डिसेंबर २०२६ पर्यंत वाहतूक बदल लागू
सातारा | प्रतिनिधी
सातारा शहरातील गोडोली नाका परिसरातील वाहतुकीत महत्त्वाचे बदल करण्यात आले आहेत. लिंबखिंड–खिंडवाडी रस्त्यावरील पालवी हॉटेलजवळील लहान पुलाचे बांधकाम सार्वजनिक बांधकाम विभागामार्फत करण्यात येणार आहे. या कामादरम्यान वाहतूक कोंडी टाळण्यासाठी सातारा पोलीस प्रशासनाने वाहतुकीचे नियोजन केले आहे.
जिल्हा पोलीस अधीक्षक निखिल पिंगळे यांनी महाराष्ट्र पोलीस अधिनियम, १९५१ मधील कलम ३४ अन्वये प्राप्त अधिकारांचा वापर करून यासंदर्भात आदेश जारी केले आहेत. हे बदल २२ ऑक्टोबर २०२६ रोजी सकाळी १० वाजल्यापासून ३१ डिसेंबर २०२६ च्या मध्यरात्रीपर्यंत लागू राहणार आहेत.
हे मार्ग वाहतुकीसाठी बंद
सातारा शहरातून गोडोली नाका आणि शिवराज पेट्रोल पंपमार्गे कराड–कोल्हापूरच्या दिशेने जाणाऱ्या सर्व प्रकारच्या वाहनांना संबंधित रस्त्यावरून जाण्यास बंदी असेल. तसेच कराड–कोल्हापूर बाजूकडून शिवराज पेट्रोल पंपमार्गे गोडोली नाका ओलांडून सातारा शहरात प्रवेश करणाऱ्या वाहनांनाही या मार्गावरून प्रवेश करता येणार नाही.
वाहतुकीसाठी पर्यायी मार्ग
१. कराड–कोल्हापूरकडून सातारा शहरात येणारी वाहने : अजंठा चौक मार्गे गोडोली नाक्यावरून शहरात प्रवेश करता येईल.
२. सातारा शहरातून कराड–कोल्हापूरकडे जाणारी वाहने : पोवई नाका–गोडोली नाका–अजंठा चौक या मार्गाचा वापर करावा.
३. स्थानिक रहिवाशांसाठी पर्याय : अवजड वाहने वगळता इतर वाहनांना अजंठा चौक–तलाठी कॉलनी–फॉरेस्ट कॉलनीमार्गे लिंबखिंड–खिंडवाडी रस्त्याचा वापर करता येईल.
४. दुसरा अंतर्गत पर्यायी मार्ग : अवजड वाहने वगळता इतर वाहनांसाठी गोडोली चौक–पालवी चौक–गोळीबार मैदान–जगदाळे बागमार्गे लिंबखिंड–खिंडवाडी रस्त्याचा पर्याय उपलब्ध असेल.
पुलाच्या बांधकामाच्या कालावधीत वाहनधारकांनी वाहतूक बदलांची नोंद घेऊन प्रवासाचे नियोजन करावे. तसेच वाहतूक सुरळीत राहण्यासाठी पोलीस प्रशासनाला सहकार्य करावे, असे आवाहन करण्यात आले आहे.
