अमली पदार्थविरोधी कारवाईबद्दल छत्रपती संभाजीनगर टास्क फोर्सच्या अधिकारी-कर्मचाऱ्यांचा गौरव

एनडीपीएस कायद्यांतर्गत कारवाया आणि युवकांमधील जनजागृतीची दखल; विशेष पोलीस महानिरीक्षक ज्योतिप्रिया सिंह यांच्या हस्ते सत्कार

छत्रपती संभाजीनगर | प्रतिनिधी

राज्यात अमली पदार्थांची अवैध विक्री, उत्पादन आणि तस्करी रोखण्यासाठी अमली पदार्थविरोधी टास्क फोर्सकडून विविध ठिकाणी कारवाया करण्यात येत आहेत. या मोहिमेत उल्लेखनीय कामगिरी केल्याबद्दल छत्रपती संभाजीनगर अमली पदार्थविरोधी टास्क फोर्स कृती दलातील अधिकारी व अंमलदारांचा विशेष पोलीस महानिरीक्षक ज्योतिप्रिया सिंह यांच्या हस्ते गौरव करण्यात आला.

१६ ऑक्टोबर २०२६ रोजी पुणे येथील अमली पदार्थविरोधी टास्क फोर्स कार्यालयात हा सत्कार सोहळा पार पडला. गांजा, अफू आणि एमडी ड्रग्जविरोधात एनडीपीएस कायद्यांतर्गत केलेल्या कारवाया तसेच युवा पिढीमध्ये अमली पदार्थांच्या दुष्परिणामांविषयी राबविलेल्या जनजागृती मोहिमेची दखल घेऊन हा गौरव करण्यात आला.

राज्यभरात ६३ कारवाया; १०५ आरोपींना अटक

विशेष पोलीस महानिरीक्षक ज्योतिप्रिया सिंह यांनी पत्रकार परिषदेत दिलेल्या माहितीनुसार, जानेवारी २०२६ ते १६ ऑक्टोबर २०२६ या कालावधीत अमली पदार्थविरोधी टास्क फोर्सने राज्यभरात ६३ कारवाया केल्या. या कारवायांमध्ये एकूण १०५ आरोपींना अटक करण्यात आली. या मोहिमेत १२ कोटी ११ लाख रुपयांचे अमली पदार्थ आणि १ कोटी ८० लाख रुपयांचे अन्य साहित्य, असा एकूण १३ कोटी ९१ लाख रुपयांचा मुद्देमाल जप्त करण्यात आल्याची माहिती देण्यात आली.

अधिकारी व अंमलदारांचा सन्मान

गौरव करण्यात आलेल्या पथकात डीवायएसपी साईनाथ ठोंबरे, पोलीस निरीक्षक गीता बागवडे, पोलीस उपनिरीक्षक प्रदीप ठाकूर, सहाय्यक पोलीस उपनिरीक्षक वाहेद मुल्ला व हनुमान पुरके यांच्यासह हेड कॉन्स्टेबल रविंद्र साळवे, कैलास गाडेकर, नितीन जाधव, शैला टेळे, सुरेश राऊत, नागेश केंद्रे, निलेश सरपाळे, राहुल काळे, अतुल तुपे, हरिश्चंद्र मुंढे, सूरज जोनवाल, ज्ञानेश्वर चव्हाण, आम्रपाली सूर्यवंशी, ज्योती कीर्तीकर, ज्ञानेश्वर शेलार आणि प्रियंका पवार यांचा समावेश आहे.

या पथकाला पोलीस अधीक्षक अजित टिके यांचे मार्गदर्शन लाभले. सत्कारप्रसंगी अमली पदार्थविरोधी टास्क फोर्सच्या विशेष पोलीस महानिरीक्षक ज्योतिप्रिया सिंह, पोलीस निरीक्षक प्रवीण पाटील, पोलीस उपनिरीक्षक अनुज तारे आणि हिम्मतराव जाधव यांच्यासह पोलीस दलातील अधिकारी उपस्थित होते. त्यांनी पथकातील अधिकारी व कर्मचाऱ्यांचे अभिनंदन करून पुढील कार्यासाठी शुभेच्छा दिल्या.