एकूण ३३ हजार ५११ रुपयांची बक्षिसे; नऊ दिवस धार्मिक, सांस्कृतिक आणि भक्तिमय कार्यक्रमांची मेजवानी
माढेळी | प्रतिनिधी :
माढेळी येथील सुभाष चौकातील नामांकित आदर्श दुर्गा उत्सव मंडळाने यंदा स्थापनेची ३५ वर्षे पूर्ण केली आहेत. या वर्धापनदिनानिमित्त नवरात्रोत्सव विविध धार्मिक, सामाजिक आणि सांस्कृतिक कार्यक्रमांनी उत्साहात साजरा करण्यात येत आहे. उत्सवाचे प्रमुख आकर्षण म्हणून गुरुवार, २२ ऑक्टोबर रोजी सुभाष चौक येथे भव्य वारकरी दिंडी स्पर्धा आणि गरबा महोत्सवाचे आयोजन करण्यात आले आहे.
दिंडी स्पर्धेसाठी ३३ हजार ५११ रुपयांची बक्षिसे
मंडळाच्या वतीने आयोजित वारकरी दिंडी स्पर्धेत सहभागी होणाऱ्या पथकांना प्रोत्साहन देण्यासाठी एकूण ३३ हजार ५११ रुपयांची रोख बक्षिसे ठेवण्यात आली आहेत. स्पर्धेतील प्रथम क्रमांकासाठी ७ हजार १ रुपये, द्वितीय क्रमांकासाठी ६ हजार १ रुपये, तर अकराव्या क्रमांकासाठी १ हजार १०१ रुपयांचे बक्षीस दिले जाणार आहे. स्पर्धेत एकूण ११ बक्षिसे देण्यात येणार आहेत.
याशिवाय उत्कृष्ट कलाकारांना प्रोत्साहन देण्यासाठी विशेष वैयक्तिक बक्षिसांची घोषणाही करण्यात आली आहे. उत्कृष्ट मृदंगवादकासाठी अमोल काटकर, उत्कृष्ट गायकासाठी किशोर घटे आणि उत्कृष्ट वीणावादकासाठी सचिन नरड यांच्या वतीने प्रत्येकी ५०१ रुपयांचे रोख बक्षीस दिले जाणार आहे.
माजी सैनिक सचिनभाऊ धात्रक यांच्या सौजन्याने गरबा महोत्सव
नवरात्रोत्सवानिमित्त माजी सैनिक सचिनभाऊ धात्रक यांच्या सौजन्याने सुभाष चौक येथे भव्य गरबा महोत्सवाचे आयोजन करण्यात आले आहे. नऊ दिवस चालणाऱ्या या उत्सवात भक्तिसंगीत, महाप्रसाद आणि विविध सांस्कृतिक कार्यक्रमांची मेजवानी भाविकांना अनुभवता येणार आहे.
३५ वर्षांची परंपरा जपण्यासाठी मंडळाचे प्रयत्न
मंडळाचा ३५ वा वर्धापनदिन सोहळा यशस्वी करण्यासाठी अध्यक्ष अमोल काटकर, उपाध्यक्ष प्रमोद देवतळे, कोषाध्यक्ष सचिन नरड आणि किशोर घटे यांच्या मार्गदर्शनाखाली सर्व सदस्य व कार्यकर्ते परिश्रम घेत आहेत. कार्यक्रमाच्या नियोजनात अतुल पावाडे, नंदू धात्रक यांच्यासह मंडळाचे इतर सदस्य सक्रिय सहभाग घेत आहेत.
या धार्मिक आणि सांस्कृतिक कार्यक्रमांना नागरिकांनी, भाविकांनी तसेच वारकरी दिंडी पथकांनी मोठ्या संख्येने उपस्थित राहून उत्सवाची शोभा वाढवावी, असे आवाहन आदर्श दुर्गा उत्सव मंडळाच्या वतीने करण्यात आले आहे.
