२० कोटींचे काम १८ महिन्यांत पूर्ण; दोन पुलांच्या लोकार्पणामुळे ग्रामीण भागातील दळणवळणाला चालना
शहादा, दि. १९ (प्रतिनिधी) : शहादा तालुक्यातील तिखोरा गावालगत गोमाई नदीवरील सुमारे २०० मीटर लांबीचा नवीन पूल वाहतुकीसाठी खुला करण्यात आला आहे. सुमारे २० कोटी रुपये खर्चाच्या या पुलाचे काम २६ महिन्यांच्या निर्धारित मुदतीऐवजी अवघ्या १८ महिन्यांत पूर्ण करण्यात आले. त्यामुळे परिसरातील नागरिक, विद्यार्थी आणि वाहनचालकांना मोठा दिलासा मिळणार आहे.
सोमवार, दि. २० ऑक्टोबर रोजी शहादा-तळोदा विधानसभा मतदारसंघाचे आमदार राजेश पाडवी यांच्या उपस्थितीत आणि परिसरातील नेते बापूसाहेब दीपक पाटील यांच्या हस्ते पुलाचे लोकार्पण करण्यात आले. यावेळी नंदुरबार जिल्हा परिषदेच्या माजी शिक्षण व आरोग्य सभापती जयश्रीताई दीपक पाटील, शहादा नगरपालिकेचे गटनेते तथा प्राचार्य मकरंद पाटील यांच्यासह विविध लोकप्रतिनिधी, पदाधिकारी आणि नागरिक उपस्थित होते.
जुन्या पुलाच्या जागी उभारला उंच पूल
तिखोरा येथील जुना पूल पाडून त्याच ठिकाणी अधिक उंचीचा नवीन पूल उभारण्यात आला आहे. गेल्या अनेक महिन्यांपासून सुरू असलेल्या बांधकामामुळे परिसरातील नागरिकांना ये-जा करताना अडचणींचा सामना करावा लागत होता. विद्यार्थ्यांच्या शैक्षणिक प्रवासावरही त्याचा परिणाम होत होता. मात्र, पुलाचे काम निर्धारित मुदतीपूर्वी पूर्ण झाल्याने आता या मार्गावरील वाहतूक अधिक सुरळीत होण्यास मदत होणार आहे.
मामाच्या मोहिदा येथील पुलाचेही लोकार्पण
तिखोरा येथील पुलासोबतच मामाच्या मोहिदा गावालगत उंचावण्यात आलेल्या फरशी पुलाचेही लोकार्पण करण्यात आले. या पुलामुळे सोनवद, काठूड, काठोल आदी परिसरातील नागरिक आणि विद्यार्थ्यांची दळणवळणाची समस्या कमी होण्यास मदत होणार आहे. या मार्गावरील प्रवास अधिक सुलभ होण्याची अपेक्षा व्यक्त केली जात आहे.
नवरात्रीच्या नवमीच्या शुभमुहूर्तावर तालुक्यातील दोन महत्त्वाच्या पुलांचे लोकार्पण झाल्याने परिसरातील नागरिकांमध्ये समाधानाचे वातावरण आहे. या पुलांमुळे ग्रामीण भागातील दळणवळणाला चालना मिळण्याबरोबरच विद्यार्थ्यांची आणि सर्वसामान्य प्रवाशांची गैरसोय दूर होण्यास मदत होणार आहे.
