खड्डेमय रस्त्यांमुळे अपघातांचा धोका; अतिक्रमणांवर ठोस कारवाई करण्याची नागरिकांची मागणी
शहादा, दि. १९ (प्रतिनिधी) : शहादा शहरातील खड्डेमय रस्ते आणि वाढत्या अतिक्रमणांच्या समस्यांमुळे नागरिकांना मोठ्या अडचणींचा सामना करावा लागत आहे. मुख्य रस्त्यांसह विविध कॉलनी आणि वसाहतींमधील रस्त्यांची दुरवस्था झाली असून, अनेक ठिकाणी अतिक्रमणांमुळे वाहतुकीलाही अडथळे निर्माण होत असल्याच्या तक्रारी नागरिकांकडून करण्यात येत आहेत. नगरपालिका प्रशासनाने या समस्यांकडे गांभीर्याने लक्ष देऊन तातडीने उपाययोजना कराव्यात, अशी मागणी होत आहे.
सुमारे चार ते पाच वर्षांच्या प्रशासकीय कारभारानंतर जानेवारी महिन्यापासून शहादा नगरपालिकेत लोकनियुक्त नगराध्यक्ष आणि नगरसेवकांचा कारभार सुरू झाला. शहरात जनता विकास आघाडीचे नगराध्यक्ष व दहा नगरसेवक, तर भारतीय जनता पक्षाचे वीस नगरसेवक आणि उपनगराध्यक्ष कार्यरत असल्याचे सांगण्यात येते. गेल्या काही महिन्यांत पालिकेच्या सर्वसाधारण सभांमध्ये विविध विकासकामांचे विषय मंजूर झाले असले, तरी अनेक कामांना प्रत्यक्षात अपेक्षित गती मिळालेली नसल्याची टीका नागरिकांकडून होत आहे.
दोंडाईचा रस्त्याची दुरवस्था; अपघातांचा धोका
शहरातील श्री छत्रपती शिवाजी महाराज यांच्या पुतळ्यापासून बसस्थानकापर्यंत जाणाऱ्या दोंडाईचा रस्त्याची अवस्था अत्यंत खराब झाल्याचे चित्र आहे. रस्त्याच्या दोन्ही बाजूंना मोठे खड्डे पडल्याने वाहनचालक आणि प्रवाशांना अडचणींचा सामना करावा लागत आहे. या रस्त्याची दुरुस्ती करण्याबाबत विविध संघटनांनी यापूर्वी प्रशासनाला निवेदने दिल्याचे सांगण्यात येते. मात्र, अद्याप ठोस उपाययोजना झाल्या नसल्याची नागरिकांची तक्रार आहे. त्यामुळे या मार्गावर अपघात होण्याची शक्यता व्यक्त केली जात आहे.
मुख्य रस्ते आणि मोकळ्या जागांवरील अतिक्रमणांचा प्रश्न
शहरातील मुख्य रस्त्यांसह नगरपालिकेच्या काही मोकळ्या जागांवर अतिक्रमणे वाढत असल्याचा आरोप होत आहे. प्रेस मारुती मैदान, जुना मोहिदा रोड, डोंगरगाव रोड आणि गरीब नवाज कॉलनी परिसरात अतिक्रमणांमुळे समस्या निर्माण होत असल्याच्या तक्रारी आहेत. नगरपालिका प्रशासन आणि अतिक्रमण निर्मूलन पथकाने याकडे लक्ष देऊन नियमानुसार कारवाई करावी, अशी मागणी नागरिकांकडून होत आहे.
रस्त्यांची दुरुस्ती, वाहतुकीतील अडथळे दूर करणे आणि अतिक्रमणांवर नियंत्रण ठेवणे या बाबींना प्राधान्य देण्याची गरज आहे. भविष्यात एखादी दुर्घटना घडू नये, यासाठी संबंधित अधिकाऱ्यांनी तातडीने पाहणी करून आवश्यक उपाययोजना कराव्यात, अशी अपेक्षा शहादावासीयांकडून व्यक्त होत आहे.
