चिंचवडमध्ये श्री कालिका देवी मंदिराचा नवरात्रोत्सव उत्साहात!

धार्मिक विधी, दांडिया-गरबा, स्पर्धा आणि सांस्कृतिक कार्यक्रमांची रेलचेल; विद्यार्थ्यांच्या कलागुणांनाही मिळणार वाव

प्रतिनिधी :

चिंचवड, पिंपरी-चिंचवड : चिंचवड येथील मोहननगर परिसरातील श्री कालिका देवी मंदिरात श्री कालिका देवी प्रसन्न व सौ. क्ष. कासार समाजसेवा मंडळाच्या वतीने शारदीय नवरात्रोत्सव २०२६ चे आयोजन करण्यात आले आहे. ११ ते २० ऑक्टोबरदरम्यान आयोजित या उत्सवात धार्मिक विधी, भजन, आरती, दांडिया-गरबा आणि विविध सांस्कृतिक कार्यक्रमांमुळे परिसरात भक्तिमय व उत्साही वातावरण निर्माण झाले आहे.

नवरात्रोत्सवाची सुरुवात ११ ऑक्टोबर रोजी घटस्थापना आणि महाअभिषेकाने झाली. उत्सवाच्या कालावधीत दररोज सकाळी आरती, सायंकाळी भजन आणि रात्री दांडिया-गरबा कार्यक्रमांचे आयोजन करण्यात आले. समाजातील विविध क्षेत्रांत कार्यरत मान्यवरांच्या हस्ते आरती करण्यात येत आहे.

विद्यार्थ्यांसाठी विविध स्पर्धा आणि कार्यशाळा

उत्सवाच्या निमित्ताने विद्यार्थ्यांच्या कलागुणांना प्रोत्साहन देण्यासाठी चित्रकला स्पर्धा, विज्ञान प्रदर्शन आणि ओरिगामी कार्यशाळेचे आयोजन करण्यात आले आहे. याशिवाय मेहंदी स्पर्धा, रांगोळी स्पर्धा, खाद्यपदार्थांचे स्टॉल, आनंद मेळावा आणि विविध सांस्कृतिक कार्यक्रम हे उत्सवाचे आकर्षण ठरत आहेत.

१८ ऑक्टोबर रोजी पालखी नगरप्रदक्षिणा, होमहवन आणि सांस्कृतिक भवनाच्या शेडच्या लोकार्पण सोहळ्याचे आयोजन करण्यात आले. विजयादशमीनिमित्त २० ऑक्टोबर रोजी महाअभिषेक, आरती आणि शमीपूजन होणार आहे.

कोजागिरी पौर्णिमा आणि देवीच्या वाढदिवसानिमित्त विशेष कार्यक्रम

२५ ऑक्टोबर रोजी कोजागिरी पौर्णिमेनिमित्त कीर्तन, गुणवंत विद्यार्थ्यांचा गुणगौरव आणि विविध स्पर्धांतील विजेत्यांना पारितोषिक वितरण करण्यात येणार आहे. तसेच २७ ऑक्टोबर रोजी श्री कालिका देवीच्या वाढदिवसानिमित्त विशेष पूजा, महाआरती आणि महाप्रसादाचे आयोजन करण्यात आले आहे.

धार्मिक परंपरांचे जतन करण्याबरोबरच समाजातील नागरिकांना एकत्र आणणे, विद्यार्थ्यांच्या कलागुणांना वाव देणे आणि सामाजिक सलोखा वाढविणे हा या उत्सवामागील प्रमुख उद्देश आहे. नागरिकांनी आणि भाविकांनी विविध कार्यक्रमांत सहभागी व्हावे, असे आवाहन आयोजकांच्या वतीने करण्यात आले आहे.

उत्सवाबाबत अधिक माहितीसाठी ज्ञानेश्वर साळवी (८२०८१ ४३५५२) किंवा सौ. चंचल लोखंडे (९०२१३३९६९०) यांच्याशी संपर्क साधावा.

आयोजक : श्री कालिका देवी प्रसन्न व सौ. क्ष. कासार समाजसेवा मंडळ, मोहननगर, चिंचवड.