मेहकरमध्ये कर्तृत्ववान महिलांचा सन्मान; आर्थिक स्वावलंबनासाठी बचत, गुंतवणूक आणि आर्थिक नियोजनाचा संदेश
मेहकर प्रतिनिधी
मेहकर, दि. १८ : सामाजिक, शैक्षणिक, राजकीय आणि विविध क्षेत्रांत आपल्या कर्तृत्वाचा ठसा उमटविणाऱ्या महिलांचा सन्मान करण्यासोबतच महिलांमध्ये आर्थिक साक्षरता वाढविण्याच्या उद्देशाने राजर्षी शाहू मल्टीस्टेटच्या वतीने ‘जागर स्त्रीशक्तीचा, आर्थिक साक्षरतेचा’ हा उपक्रम आयोजित करण्यात आला. या कार्यक्रमात कर्तृत्ववान महिलांचा गौरव करण्यात आला, तसेच आर्थिकदृष्ट्या सक्षम होण्यासाठी बचत, गुंतवणूक आणि आर्थिक व्यवहारांचे महत्त्व अधोरेखित करण्यात आले.
महिलांनी स्वतःचे बँक खाते असावे, नियमित बचतीची सवय लावावी, पैशांची योग्य ठिकाणी गुंतवणूक करावी आणि आर्थिक निर्णय स्वतः घेण्याची क्षमता विकसित करावी, असा संदेश या उपक्रमातून देण्यात आला. विविध क्षेत्रांत स्वतंत्र ओळख निर्माण करणाऱ्या महिलांच्या कार्याचा गौरव करून त्यांना प्रोत्साहन देण्यात आले.
कार्यक्रमाच्या अध्यक्षस्थानी राजर्षी शाहू मल्टीस्टेटच्या अध्यक्ष मालतीताई शेळके होत्या. प्रमुख उपस्थितांमध्ये शिवसेना उद्धव बाळासाहेब ठाकरे गटाच्या राज्य प्रवक्त्या जयश्रीताई शेळके, संस्थेच्या संचालिका छाया शेळके, मेहकर नगरपरिषदेच्या शिक्षण सभापती डॉ. दीपिका राठोड, नगरसेविका रुपाली गारोळे, शाल्मली रायमुलकर, प्रा. संध्या पाटेकर आणि पल्लवी वानखेडे यांच्यासह अन्य मान्यवर उपस्थित होते.
प्रास्ताविकात गोविंद येवले यांनी राजर्षी शाहू मल्टीस्टेटच्या कार्याची व्याप्ती, संस्थेची कार्यपद्धती आणि आर्थिक व्यवहारांतील पारदर्शकतेविषयी माहिती दिली. संस्थेमार्फत ग्राहकांना पुरविण्यात येणाऱ्या सेवा तसेच महिलांसाठी उपलब्ध आर्थिक संधींची माहितीही त्यांनी विशद केली.
अध्यक्षीय मार्गदर्शन करताना मालतीताई शेळके यांनी महिलांनी आर्थिक नियोजनाला प्राधान्य देण्याचे आवाहन केले. नियमितपणे छोटी-छोटी बचत करून तिची योग्य पद्धतीने गुंतवणूक केल्यास आर्थिक स्थैर्य निर्माण करण्यास मदत होते. राजर्षी शाहू मल्टीस्टेटमध्ये महिलांसाठी उपलब्ध असलेल्या विविध योजनांची माहिती घेऊन त्यांचा लाभ घ्यावा, असेही त्यांनी सांगितले.
जयश्रीताई शेळके यांनी महिलांनी आर्थिक व्यवहारांमध्ये स्वावलंबी होण्याचे महत्त्व अधोरेखित केले. महिलांनी स्वतःचे बँक खाते उघडावे, आर्थिक व्यवहार स्वतः हाताळावेत आणि पैशांचा योग्य विनियोग करण्याबाबत जागरूक राहावे, असे आवाहन त्यांनी केले. आर्थिक साक्षरता ही महिलांच्या आत्मनिर्भरतेसाठी महत्त्वाची असून, शिक्षणाच्या माध्यमातून महिलांना स्वतःच्या पायावर उभे राहण्याचे बळ मिळते, असे त्यांनी नमूद केले.
यावेळी डॉ. दीपिका राठोड, रुपाली गारोळे, शाल्मली रायमुलकर आणि प्रा. संध्या पाटेकर यांनी मनोगत व्यक्त केले. महिलांना मिळणाऱ्या संधी, त्यांचे सामाजिक योगदान आणि आर्थिक स्वावलंबनाची गरज यावर त्यांनी प्रकाश टाकला.
महिलांच्या कर्तृत्वाचा सन्मान, आर्थिक साक्षरतेचा प्रसार आणि स्वावलंबनाची प्रेरणा या तीन महत्त्वाच्या बाबींचा संगम या उपक्रमातून साधण्यात आला. कार्यक्रमाचे सूत्रसंचालन अर्चना बोरे यांनी केले, तर गोविंद येवले यांनी आभार मानले.
