नऊ दिवसांच्या दौडीला ग्रामस्थांचा उत्स्फूर्त प्रतिसाद; अंतिम दिवशी सर्वांनी सहभागी होण्याचे श्री शिवप्रतिष्ठान हिंदुस्थानचे आवाहन
वाघोत्रे, कोल्हापूर : श्री शिवप्रतिष्ठान हिंदुस्थान, वाघोत्रे यांच्या वतीने गावात गेल्या नऊ दिवसांपासून सुरू असलेल्या श्री दुर्गामाता दौडीचा उद्या, मंगळवार दि. २० ऑक्टोबर २०२६ रोजी समारोप होणार आहे. या दौडीला गावातील ग्रामस्थांचा उत्स्फूर्त प्रतिसाद मिळाला असून, अंतिम दिवशीही मोठ्या संख्येने सहभागी होण्याचे आवाहन आयोजकांनी केले आहे.
वाघोत्रे हे छोटे गाव असले तरी श्री दुर्गामाता दौडीमध्ये ग्रामस्थांनी मोठ्या उत्साहाने सहभाग नोंदविला. काही वैयक्तिक कारणांमुळे, दुग्धव्यवसायामुळे किंवा अन्य अडचणींमुळे मागील दिवसांत सहभागी होऊ न शकलेल्या ग्रामस्थांनी शेवटच्या दिवशी आवर्जून उपस्थित राहावे, असे आवाहन करण्यात आले आहे.
गाव, देव, देश आणि धर्माप्रती जागरूकता निर्माण करणे, तसेच छत्रपती शिवाजी महाराजांचे कार्य आणि छत्रपती संभाजी महाराजांच्या अतुलनीय त्यागाचे स्मरण करणे, हा या उपक्रमामागील उद्देश असल्याचे आयोजकांनी सांगितले.
अंतिम दिवशी लहानांपासून ज्येष्ठ नागरिकांपर्यंत सर्वांनी, महिला व पुरुषांनी शक्य तितक्या मोठ्या संख्येने सहभागी व्हावे, असे आवाहन करण्यात आले आहे.
उद्याची दौड सकाळी ६.१५ वाजता गावातील देवळापासून सुरू होणार असून, सर्व ग्रामस्थांनी वेळेवर उपस्थित राहावे, असे आवाहन श्री शिवप्रतिष्ठान हिंदुस्थान, वाघोत्रे यांच्या वतीने करण्यात आले आहे.
