दोन दिवसांत सहा किल्ले सर करण्याचा विक्रम नावावर; ४८ वी नाईट कॅम्पिंग मोहीम पूर्ण करताना सुरक्षेला दिले सर्वोच्च प्राधान्य
माणगाव/खोपवली : रायगड जिल्ह्यातील माणगाव तालुक्यातील चन्नाट येथील साहसी गिर्यारोहक दुर्गेश डांगळे यांनी १७ आणि १८ ऑक्टोबरदरम्यान गोरखगड ते आहुपे घाट असा आव्हानात्मक सोलो रेंज ट्रेक यशस्वीपणे पूर्ण केला. दोन दिवसांत सहा किल्ले सर करण्याचा विक्रम नावावर असलेल्या दुर्गेश यांच्यासाठी ही मोहीम विशेष ठरली. त्यांचा हा पाचवा सोलो रेंज ट्रेक, तर सह्याद्रीच्या कुशीत केलेली ४८ वी नाईट कॅम्पिंग मोहीम होती.
या मोहिमेची सुरुवात १७ ऑक्टोबर रोजी खोपवलीमार्गे देहरी गावातून झाली. सुरक्षेच्या दृष्टीने गावातील स्थानिकांकडे नोंद करून दुर्गेश यांनी अवघ्या दीड तासात गोरखगड सर केला. त्यानंतर रायगड आणि पुणे जिल्ह्यांना जोडणाऱ्या ऐतिहासिक आहुपे घाटाच्या दुर्गम मार्गाने त्यांनी घनदाट जंगलातून सुमारे अडीच तास एकट्याने पायपीट केली.
या प्राचीन व्यापारी मार्गावर त्यांना जुन्या संस्कृतीचे अवशेष, दगडी पायऱ्या आणि पाण्याची दोन टाकी आढळली. या अवशेषांचे त्यांनी कॅमेऱ्यात चित्रीकरण केले. घाटमाथ्यावरील रिसॉर्टमध्ये नाश्ता केल्यानंतर त्यांनी रात्रीच्या मुक्कामासाठी खेतोबा मंदिराजवळ तंबू उभारला. निसर्गाच्या सान्निध्यात त्यांनी आपली ४८ वी नाईट कॅम्पिंग मोहीम पूर्ण केली.
मात्र, १८ ऑक्टोबर रोजी सकाळी मोबाईलची बॅटरी पूर्णपणे संपल्याने संपर्क साधणे आणि पुढील मार्ग शोधणे कठीण झाले. गायदरा, दमदम्या डोंगर आणि सिद्धगड असा पुढील रेंज ट्रेक करण्याचे त्यांचे नियोजन होते. परंतु, मोबाईल बंद असताना घनदाट जंगलात पुढे जाणे धोकादायक ठरू शकते, हे लक्षात घेऊन त्यांनी खेतोबा मंदिराजवळच मोहीम थांबवण्याचा निर्णय घेतला. त्यानंतर राजगुरुनगरमार्गे एसटी बस आणि पुण्याहून रेल्वेने त्यांनी सुखरूप मुंबई गाठली.
साहसाबरोबरच सुरक्षिततेला प्राधान्य देत योग्य वेळी माघार घेण्याचा निर्णय दुर्गेश यांनी घेतला. आहुपे घाटातील दुर्मिळ अवशेषांचे दस्तऐवजीकरण केल्याने त्यांच्या मोहिमेला ऐतिहासिक आणि भौगोलिक महत्त्वही प्राप्त झाले आहे.
या अनुभवातून दुर्गेश डांगळे यांनी गिर्यारोहकांना महत्त्वाचा संदेश दिला. “सह्याद्रीत सोलो ट्रेक करताना धाडस दाखवा; मात्र सुरक्षेला पहिले प्राधान्य द्या. फोन बंद झाल्यानंतर पुढे जाणे शक्य वाटले असते, पण तो निर्णय धोकादायक ठरला असता. वेळेवर घेतलेला योग्य निर्णयच तुम्हाला सुरक्षित घरी पोहोचवतो,” असे त्यांनी सांगितले.
