जत बाजारपेठेत महिला शौचालयाचा प्रश्न ऐरणीवर; नागरिकांमधून संताप
जत: (प्रतिनिधी) जत शहराची मुख्य बाजारपेठ ही तालुक्यातील आर्थिक व्यवहाराचे केंद्र आहे. मात्र, याच गजबजलेल्या बाजारपेठेत महिलांसाठी सुसज्ज सार्वजनिक शौचालय उपलब्ध नसल्याने महिलांची मोठी कुचंबणा होत आहे. हा विषय सध्या शहरात आणि ग्रामीण भागातून येणाऱ्या नागरिकांमध्ये चर्चेचा आणि संतापाचा विषय बनला आहे.
नेमकी समस्या काय?
हजारो महिलांची ये-जा: जतच्या बाजारासाठी तालुक्यातील शेकडो गावांमधून हजारो महिला दररोज शहरात येतात. मात्र, तातडीच्या वेळी त्यांना हक्काची आणि सुरक्षित जागा मिळत नाही.
सुरक्षिततेचा प्रश्न: मुख्य बाजारपेठेत महिलांसाठी स्वतंत्र आणि सुरक्षित शौचालय नसल्याने महिलांना खासगी हॉस्पिटल्स किंवा ओळखीच्या घरांचा आधार घ्यावा लागतो.
नागरिकांची मागणी
व्यापारी आणि महिला ग्राहकांमधून प्रशासनाविरुद्ध नाराजी व्यक्त होत आहे. “नगर परिषदेने केवळ कर वसुलीकडे लक्ष न देता, महिलांच्या आरोग्याचा आणि प्रतिष्ठेचा विचार करून बाजारपेठेच्या मध्यवर्ती ठिकाणी स्वच्छ आणि हायटेक महिला शौचालय उभारावे,” अशी नागरिकांत चर्चाला जोर धरत आहे.
“शहराचा विस्तार होत असताना मूलभूत सुविधांकडे दुर्लक्ष होणे दुर्दैवी आहे. विशेषतः महिलांची होणारी गैरसोय प्रशासनासाठी भूषणावह नाही.” — एक त्रस्त महिला ग्राहक
