नवेगाव प्रतिनीधी/प्रदीप ताजने.
पातुर तालुक्यातील नवेगाव येथे एका घरामध्ये आग लागून सिलेंडरचा भीषण स्फोट होऊन संपुर्ण घर भस्मसात झाले.नेमके यावेळेस घरामध्ये कुणी नसल्याने सुदैवाने जिवित हानी टळली. मात्र आगीमध्ये अन्नधान्य, भांडी,कपडे आणि ईतर साहित्याचे मोठे नुकसान झाले आहे.
मिळालेल्या प्राथमिक माहितीनुसार नवेगाव येथील रामकृष्ण कळणु खुळे यांच्या घराचे बांधकाम सुरु असल्यामुळे ते काही काळासाठी प्रल्हाद डाखोरे यांच्या घरात वास्तव्यास आहेत. शुक्रवारी ६ मार्च रोजी दुपारी रामकृष्ण खुळे यांची पत्नी पिठगिरणीवर दळण आणण्यासाठी गेली होती.यावेळी घरामध्ये कुणी नसतांना अचानक आग लागून सिलेंडरचा स्फोट झाला.
स्फोटाचा आवाज एवढा मोठा होता कि गावामध्ये गोंधळ उडून भीतीचे वातावरण निर्माण झाले.
गावकऱ्यांची सतर्कता आणि प्रसंगावधान.
स्फोटानंतर आगीने रौद्र रूप धारण केले यावेळी आगीचे आणि धुराचे लोट हे दूरवरून दिसत होते.दरम्यान गावकऱ्यांनी प्रसंगावधान राखून मिळेल त्या साधनाने पाण्याचा मारा करून आग विझवण्याचा प्रयत्न केला.मात्र तोपर्यंत घरातील संपुर्ण साहित्य अन्नधान्य, भांडी,कपडे ईत्यादी जळून खाक झाले होते.अद्याप आग लागण्याचे कारण कळू शकले नाही
…शासकीय मदतीची मागणी..
या आगीत खुळे कुटुंबाचे मोठे नुकसान झाले आहे .तळहातावर घर चालविणाऱ्या या कुटुंबावर आता उदरनिर्वाहाचा प्रश्न उभा राहिला आहे.”आमचे सर्वकाही जळून खाक झाले आता जगायचे कसे “असा टाहो पिडीत कुटुंबाने फोडला आहे.
शासनाने या घटनेची तातडीने दखल घेऊन पिडीत कुटुंबाला आर्थिक मदत द्यावी अशी मागणी ग्रामस्थांकडून करण्यात येत आहे.
