कन्नड तालुका (प्रतिनिधी) :
आगामी निवडणुकांच्या पार्श्वभूमीवर संघटन बळकट करण्यासाठी आणि मतदार याद्यांचे सक्षमीकरण करण्याच्या उद्देशाने कन्नड येथे भारतीय जनता पक्षाच्या वतीने ‘मतदार यादी विशेष सखोल पुनरावलोकन’ (SIR) मोहिमेला गती देण्यात आली आहे. या मोहिमेअंतर्गत भाजप प्रदेश सरचिटणीस मा. श्री. सुनील राणे यांच्या प्रमुख मार्गदर्शनाखाली कन्नड-सोयगाव विधानसभा मतदारसंघातील ‘BLA2’ (बूथ लेव्हल एजंट) कार्यशाळा उत्साहात पार पडली.
या कार्यशाळेत बोलताना सुनील राणे यांनी मतदार यादीतील त्रुटी दूर करणे, नवीन मतदारांची नोंदणी करणे तसेच प्रत्येक बूथ स्तरावर पक्षाची बांधणी अधिक सक्षम करण्याचे महत्त्व अधोरेखित केले. “निवडणूक जिंकण्यासाठी बूथ विजय अत्यंत महत्त्वाचा असून त्यात BLA2 ची भूमिका निर्णायक असते,” असे त्यांनी स्पष्ट केले.
यावेळी भाजप जिल्हाध्यक्ष मा. श्री. संजय खंबायते यांनीही कार्यकर्त्यांना मार्गदर्शन करत जिल्ह्यातील पक्षकार्याचा आढावा घेतला. कार्यक्रमास प्रा. डॉ. संजय गव्हाणे, किशोर आबा पवार, भरतसिंग राजपूत, मंजुषाताई मालदोडे, डॉ. दिलीपसिंग राजपूत, सुभाष आबा काळे, मायाताई सुराशे, सुनील पवार, ललित सुराशे, श्रीराम जंजाळ यांच्यासह अनेक मान्यवर उपस्थित होते.
या कार्यशाळेला कन्नड व सोयगाव परिसरातील भाजपचे पदाधिकारी आणि कार्यकर्त्यांनी मोठ्या संख्येने उपस्थिती दर्शवली. प्रत्येक घरापर्यंत पोहोचून मतदार यादीचे काम पूर्ण करण्याचा निर्धार यावेळी व्यक्त करण्यात आला. कार्यक्रमाच्या यशस्वीतेसाठी स्थानिक कार्यकर्त्यांनी विशेष परिश्रम घेतले.
