नेवासा (प्रतिनिधी):
नेवासा तालुक्यातील सुरेगाव (गंगा) येथे भारतरत्न डॉ. बाबासाहेब आंबेडकर यांची १३५ वी जयंती मंगळवार, १४ एप्रिल २०२६ रोजी सावित्रीबाई फुले माध्यमिक विद्यालयाच्या प्रांगणात उत्साहपूर्ण आणि प्रेरणादायी वातावरणात साजरी करण्यात आली.
सकाळी डॉ. बाबासाहेब आंबेडकर यांच्या पुतळ्यास पुष्पहार अर्पण करून अभिवादन करण्यात आले. सायंकाळी आयोजित कार्यक्रमाची सुरुवात रवी भालेराव यांच्या प्रभावी भाषणाने झाली. त्यांनी बाबासाहेबांच्या विचारांचे महत्त्व अधोरेखित करत शिक्षण, समता, स्वातंत्र्य आणि बंधुता या मूल्यांचा जागर केला. तसेच छत्रपती शिवाजी महाराज आणि महात्मा फुले यांच्या कार्याचा संदर्भ देत समाजप्रबोधनाचा संदेश दिला.
या कार्यक्रमात विद्यार्थ्यांनीही उत्स्फूर्त सहभाग घेतला. प्रिया भालेराव व गौरव गायकवाड यांनी भाषणातून “शिका, संघटित व्हा, संघर्ष करा” तसेच “शिक्षण हे वाघिणीचे दूध आहे” या बाबासाहेबांच्या प्रेरणादायी विचारांचा उल्लेख करून उपस्थितांना प्रेरित केले.
कार्यक्रमाच्या शेवटी त्रिशरण पंचशील प्रार्थना आणि फटाक्यांच्या आतषबाजीने उत्सवाची सांगता करण्यात आली.
या कार्यक्रमाला रवी भालेराव, बाबासाहेब शिंदे, नितीन भालेराव, ऋषिकेश पारखे, संदीप भालेराव, गणेश कनगरे, सुनील गायकवाड यांच्यासह महिला व पुरुष ग्रामस्थ मोठ्या संख्येने उपस्थित होते.
