राजुरा (प्रतिनिधी):
नुकत्याच पार पडलेल्या पोलिस भरती परीक्षेत शुभांगी शतपलकर हिने उल्लेखनीय यश संपादन करत चंद्रपूर जिल्हा पोलीस दलात कॉन्स्टेबल पदासाठी निवड मिळवली आहे. तिच्या या यशामुळे परिसरात तिच्यावर कौतुकाचा वर्षाव होत आहे.
शुभांगीचे दहावीपर्यंतचे शिक्षण शिवाजी हायस्कूल, राजुरा येथे मराठी माध्यमातून झाले असून पुढील शिक्षण तिने शिवाजी कॉलेज, राजुरा येथून एम.कॉम. पर्यंत पूर्ण केले आहे. स्पर्धात्मक परीक्षा (सरळ सेवा) मार्गे तिने हे यश मिळवले आहे.
तिने ‘राजुरा भूषण महियर गुंडेविया अभ्यासिका’ येथे अभ्यास करून यश संपादन केले. तिच्यासोबत राजुरा तालुक्यातील आणखी तीन जणांचीही पोलीस दलात निवड झाली आहे.
शुभांगीच्या कुटुंबाची आर्थिक परिस्थिती साधारण असतानाही तिने चिकाटी, मेहनत आणि जिद्दीच्या जोरावर हे यश मिळवले आहे. तिचे वडील विठ्ठल शतपलकर हे नगर परिषद राजुरा येथील व्यंकटेश वाचनालयातून निवृत्त झाले आहेत, तर तिचा भाऊ पॉलिटेक्निकमध्ये मेकॅनिकल डिप्लोमा करत आहे. ८४ वर्षीय आजीच्या आशीर्वादाने तिने हा यशाचा टप्पा गाठला आहे.
तिच्या या यशाबद्दल ‘सृजन नागरिक मंच’चे संयोजक मिलिंद गड्डमवार तसेच माजी मुख्याध्यापक विजय कथले यांनी तिच्या घरी भेट देऊन अभिनंदन केले व पुढील वाटचालीस शुभेच्छा दिल्या.
परिस्थितीवर मात करत मिळवलेले हे यश नव्या पिढीसाठी प्रेरणादायी ठरत आहे.
