मानवत तालुका | प्रतिनिधी
विश्वरत्न महामानव डॉ. बाबासाहेब आंबेडकर यांच्या जयंतीनिमित्त मानवत तालुक्यातील कोल्हावाडी येथील जिल्हा परिषद प्राथमिक शाळेत “प्रारंभ बालवाचन स्पर्धा” उपक्रमाचे आयोजन करण्यात आले.
दिनांक १४ एप्रिल ते १४ जून या कालावधीत ही वाचन स्पर्धा विद्यार्थ्यांसाठी राबविण्यात येणार असून, यामध्ये विद्यार्थ्यांचा वाचन व लेखन कौशल्य विकास करण्यावर भर देण्यात आला आहे.
कार्यक्रमात शाळेचे मुख्याध्यापक बलभीम माथेले व ग्रामस्थ तसेच विद्यार्थ्यांनी डॉ. आंबेडकर यांच्या प्रतिमेला अभिवादन करून पूजन केले. यावेळी बाबासाहेबांच्या शिक्षण प्रवास, विदेशातील शिक्षण आणि राष्ट्रनिर्मितीतील योगदान यावर मार्गदर्शन करण्यात आले.
या उपक्रमांतर्गत विद्यार्थ्यांसाठी टप्प्याटप्प्याने वाचनाचे नियोजन करण्यात आले आहे. ३० एप्रिलपर्यंत सध्याच्या इयत्तेतील पुस्तके वाचून अभिप्राय लिहिणे, १ मे ते १५ मे दरम्यान पुढील इयत्तेतील पुस्तकांचे वाचन, तसेच १५ मे ते १४ जून या कालावधीत संपूर्ण शालेय वाचनालय विद्यार्थ्यांसाठी खुले ठेवण्यात येणार आहे.
शाळेत उपलब्ध ३६८ पुस्तकांचा वापर करून विद्यार्थ्यांना जास्तीत जास्त वाचनासाठी प्रोत्साहन दिले जाणार आहे. उत्कृष्ट बालवाचक विद्यार्थ्यांचा विशेष सन्मान व प्रमाणपत्र देऊन गौरव करण्यात येणार आहे.
लोकसहभागातून वाचनालय समृद्ध करण्याचा संकल्पही यावेळी व्यक्त करण्यात आला. पालकांनी या उपक्रमाचे स्वागत करत समाधान व्यक्त केले. कार्यक्रमास गावकरी मोठ्या संख्येने उपस्थित होते.
