मानवत (प्रतिनिधी)
मानवत तालुक्यातील रामेटाकळी येथील ज्ञानोपासक विद्यालयातील विद्यार्थिनी कु. दिव्या कदम हिने आपल्या वाढदिवसानिमित्त एक प्रेरणादायी उपक्रम राबवत सर्वांचे लक्ष वेधले.
१४ एप्रिल रोजी भारतरत्न डॉ. बाबासाहेब आंबेडकर यांच्या जयंतीच्या निमित्ताने तिने शाळेच्या ग्रंथालयासाठी भारतीय संविधानाची प्रत भेट दिली.
वाढदिवसानिमित्त केक, हार किंवा इतर खर्चिक गोष्टी टाळून विद्यार्थ्यांमध्ये वाचनाची आवड निर्माण व्हावी आणि संविधानाबाबत जागरूकता वाढावी या उद्देशाने तिने हा उपक्रम राबवला. संविधानाची प्रत तिने मुख्याध्यापक श्री. राम टाकळगव्हाणकर यांच्याकडे सुपूर्द केली.
आजच्या काळात वाढदिवस साजरा करण्याची पारंपरिक पद्धत बदलत असताना दिव्या कदम हिने समाजासमोर एक सकारात्मक संदेश ठेवला आहे. “वाढदिवसाचा आनंद ज्ञानरूपाने वाटणे” ही संकल्पना तिच्या कृतीतून अधोरेखित झाली.
या प्रसंगी पालक श्री. पांडुरंग कदम, शिक्षकवर्ग आणि विद्यार्थी मोठ्या संख्येने उपस्थित होते. कु. दिव्या कदम हिच्या या उपक्रमाचे सर्वत्र कौतुक होत असून इतर विद्यार्थ्यांसाठी हा उपक्रम प्रेरणादायी ठरत आहे.
