गोविंदपूर / प्रतिनिधी
कळंब तालुक्यातील गोविंदपूर येथे प्रतिवर्षाप्रमाणे यंदाही अखंड हरिनाम सप्ताह व ग्रंथराज ज्ञानेश्वरी पारायण सोहळ्याचे आयोजन करण्यात आले आहे. दि. १५ एप्रिल बुधवार ते २२ एप्रिल बुधवार या कालावधीत हा आध्यात्मिक सोहळा मोठ्या भक्तिभावाने पार पडणार आहे.
संत गोरोबा काका, संत जंगलेश्वर महाराज, संत भगवान बाबा तसेच वै. ह.भ.प. ज्ञानेश्वर माऊली चाकरवाडी यांच्या पदस्पर्शाने पावन झालेल्या या गोविंदपूर नगरीत या सप्ताहाची तब्बल ४४ वर्षांची अखंड परंपरा आहे.
या सप्ताहात दररोज विविध धार्मिक कार्यक्रमांचे आयोजन करण्यात आले आहे. सकाळी काकडा भजन, विष्णु सहस्त्रनाम, ज्ञानेश्वरी पारायण, गाथा भजन, दुपारी रामकथा, हरिपाठ तसेच रात्री हरिकीर्तन व हरिजागर असे दिवसभर चालणारे आध्यात्मिक कार्यक्रम होणार आहेत. ह.भ.प. रामायणाचार्य पल्लवीताई मुंडे यांची रामकथा दररोज दुपारी २ ते ५ या वेळेत होणार आहे.
या सप्ताहात विविध दिवशी नामवंत कीर्तनकारांचे कीर्तन होणार आहे. त्यामध्ये ह.भ.प. नारायण महाराज पिंप्रीकर, प्रल्हाद महाराज ढाकणे, नंदिनीताई मैंद, शिवलीलाताई पाटील (बार्शी), योगेश बप्पा महाराज इंगळे, प्रकाश महाराज साठे (धारूर), अदिनाथ महाराज लाड (आळंदी देवाची) यांचा समावेश आहे.
दि. २२ एप्रिल रोजी सकाळी ग्रंथराज ज्ञानेश्वरी व प्रतिमा नगर प्रदक्षिणा, त्यानंतर काल्याचे कीर्तन व महाप्रसादाने सप्ताहाची सांगता होणार आहे.
या आध्यात्मिक सोहळ्यास परिसरातील भाविकांनी मोठ्या संख्येने उपस्थित राहून लाभ घ्यावा, असे आवाहन सप्ताह कमिटी व ग्रामस्थांच्या वतीने करण्यात आले आहे.
