शहादा, दि. १५ (प्रतिनिधी)
भारतरत्न, भारतीय राज्यघटनेचे शिल्पकार डॉ. बाबासाहेब आंबेडकर यांच्या १३५ व्या जयंतीनिमित्त शहादा शहरात उत्साह, जल्लोष आणि भीममय वातावरण पाहायला मिळाले. विविध आंबेडकरी संघटना व संस्थांच्या वतीने आयोजित अभिवादन कार्यक्रम आणि भव्य मिरवणुकांमुळे संपूर्ण शहर भीममय झाले.
मुख्य अभिवादन व बुद्धवंदना
सकाळी प्रांताधिकारी कार्यालय परिसरातील डॉ. बाबासाहेब आंबेडकर यांच्या पूर्णाकृती पुतळ्याजवळ मुख्य अभिवादन कार्यक्रम पार पडला. तहसीलदार संभाजी पाटील, उपविभागीय पोलीस अधिकारी दत्ताजी पवार, पोलीस निरीक्षक हेमंत कुमार पाटील आणि मुख्याधिकारी साजिद पिंजारी यांनी पुष्पहार अर्पण करून अभिवादन केले. यावेळी सामूहिक त्रिशरण पंचशील व बुद्धवंदना घेण्यात आली.
मान्यवरांची उपस्थिती
कार्यक्रमाला नगराध्यक्ष अभिजीत पाटील, उपनगराध्यक्षा सौ. माधवी मकरंद पाटील, विविध पक्षांचे पदाधिकारी, सामाजिक कार्यकर्ते तसेच विविध संस्थांचे प्रतिनिधी मोठ्या संख्येने उपस्थित होते. सर्वांनी बाबासाहेबांच्या विचारांना अभिवादन करून सामाजिक समतेचा संदेश पुढे नेण्याचा संकल्प व्यक्त केला.
मिरवणुकीचे आकर्षण
सिद्धार्थ नगर (कुकडेल) येथून निघालेली पांढऱ्या शुभ्र वस्त्रातील मिरवणूक विशेष आकर्षण ठरली. महिला, युवक-युवती आणि नागरिकांनी शिस्तबद्ध सहभाग नोंदवत बाबासाहेबांना अभिवादन केले.
रोषणाई व सेल्फी पॉइंट
जयंती उत्सव समितीच्या वतीने परिसरात आकर्षक विद्युत रोषणाई करण्यात आली होती. “आय लव बाबासाहेब” हा सेल्फी पॉइंट तरुणाईसाठी आकर्षणाचा केंद्रबिंदू ठरला.
भव्य रथ मिरवणूक
सायंकाळी शहरातील विविध भागातून सजवलेल्या रथांद्वारे भव्य मिरवणूक काढण्यात आली. संपूर्ण शहरात “जय भीम”च्या घोषणांनी वातावरण भारावून गेले.
रात्री उशिरापर्यंत शांततेत आणि शिस्तबद्ध पद्धतीने मिरवणुका संपन्न झाल्या.
