पनवेल (प्रतिनिधी)
पनवेल महानगरपालिकेच्या कळंबोली येथील कोविड रुग्णालयात कोट्यवधी रुपयांचे वैद्यकीय साहित्य वापराविना पडून असल्याची गंभीर बाब समोर आली आहे. या पार्श्वभूमीवर विरोधी पक्षनेते अरविंद म्हात्रे यांनी १४ एप्रिल २०२६ रोजी रुग्णालयाची पाहणी करून प्रशासनाच्या निष्क्रियतेवर तीव्र नाराजी व्यक्त केली.
कोरोना काळात तात्पुरत्या स्वरूपात उभारण्यात आलेल्या या रुग्णालयात व्हेंटिलेटर्स, बेड्स, ऑक्सिजन यंत्रणा आणि इतर महागडी उपकरणे आजही वापराविना पडून असल्याचे पाहणीत आढळून आले. पाच वर्षांनंतरही हे साहित्य योग्य प्रकारे वापरात न आणल्यामुळे ते खराब होण्याच्या स्थितीत असल्याचे निदर्शनास आले.
जनतेच्या कररूपी पैशातून खरेदी केलेल्या साहित्याची अशी नासाडी होणे गंभीर असून यासंदर्भात प्रशासनाला जाब विचारणार असल्याचे अरविंद म्हात्रे यांनी सांगितले. तसेच हे साहित्य इतर शासकीय रुग्णालयांमध्ये वापरता येईल का, याचा आढावा घेण्याची सूचनाही त्यांनी केली.
दरम्यान, कळंबोली येथील जुने रुग्णालय पाडून तेथे महिलांसाठी स्वतंत्र रुग्णालय उभारण्याची मागणीही त्यांनी केली आहे.
पनवेल महानगरपालिकेच्या २०२५–२६ अर्थसंकल्पात कळंबोली येथे नवीन संसर्गजन्य रोग रुग्णालयासाठी १० कोटी रुपयांची तरतूद तसेच ४५० बेड्सचे भव्य रुग्णालय उभारण्याची योजना असूनही जुन्या साहित्याचा वापर न झाल्याने प्रशासनावर प्रश्नचिन्ह निर्माण झाले आहे.
