नागपूर (प्रतिनिधी)
नागपूरच्या वाठोडा पोलिस ठाण्याच्या हद्दीत बिडगाव येथे घडलेल्या एका अत्यंत दुर्दैवी घटनेत दोन वर्षांच्या चिमुकल्याचा मृत्यू झाला आहे. पाणी समजून टरपेंटाईन प्राशन केल्याने ही घटना घडली असून परिसरात शोककळा पसरली आहे.
मृत बालकाचे नाव अद्विक शाम भदाडे असे आहे.
मिळालेल्या माहितीनुसार, घराचे रंगकाम काही दिवसांपूर्वी पूर्ण झाल्यानंतर शिल्लक राहिलेले टरपेंटाईन घरात स्टोअर रुममध्ये ठेवण्यात आले होते. दरम्यान घरातील सदस्य इतर कामात व्यस्त असताना अद्विक खेळता-खेळता त्या बाटलीजवळ गेला आणि त्याने ती द्रवपदार्थ पाणी समजून प्राशन केला.
यानंतर त्याची प्रकृती अचानक बिघडली. कुटुंबीयांनी त्याला तातडीने रुग्णालयात नेले, मात्र डॉक्टरांनी त्याला मृत घोषित केले. या घटनेमुळे परिसरात हळहळ व्यक्त केली जात आहे.
टरपेंटाईन म्हणजे काय?
टरपेंटाईन हे एक उग्र सुवासाचे रसायन असून त्याचा वापर प्रामुख्याने ऑईल पेंट पातळ करणे, ब्रश साफ करणे आणि औद्योगिक स्वच्छता कामांसाठी केला जातो. काही पारंपरिक मलमांमध्ये व बाह्य उपचारांमध्ये याचा मर्यादित वापर आढळतो.
हे द्रव्य अत्यंत धोकादायक असल्याने ते लहान मुलांच्या आवाक्याबाहेर, सुरक्षित ठिकाणी ठेवणे आवश्यक असते.
