मारेगाव (प्रतिनिधी) : तालुक्यातील बांधकाम मजुरांच्या प्रलंबित प्रश्नांकडे लक्ष वेधण्यासाठी धनुष्यबाण चिन्हाखाली कार्यरत शिवसेना महिला कार्यकर्त्यांनी मारेगाव पंचायत समितीवर धडक देत गटविकास अधिकाऱ्यांना निवेदन सादर केले.
तालुक्यात मोठ्या प्रमाणावर बांधकाम मजूर असून, त्यांच्या कागदपत्रांची पूर्तता होत नसल्यामुळे गेल्या दोन वर्षांपासून विविध अडचणी निर्माण झाल्या आहेत. संबंधित अधिकाऱ्यांकडून आवश्यक कागदपत्रांवर वेळेवर सह्या होत नसल्याने मजुरांना शासनाच्या विविध योजनांचा लाभ मिळण्यात अडथळे येत असल्याची तक्रार यावेळी करण्यात आली.
या पार्श्वभूमीवर नरसाळा येथील शिवसेना महिला कार्यकर्त्यांनी एकत्र येत पंचायत समिती कार्यालयात जाऊन गटविकास अधिकाऱ्यांना निवेदन दिले. हे निवेदन शिवसेना तालुकाप्रमुख विशाल किन्नेकार तसेच वनोजादेवी येथील उपसरपंच प्रशांत भंडारी यांच्या मार्गदर्शनाखाली सादर करण्यात आले.
महिला कार्यकर्त्यांनी बांधकाम मजुरांना त्यांचा हक्क मिळावा, तसेच प्रलंबित कागदपत्रांवर तातडीने कार्यवाही करावी, अशी मागणी केली. या आंदोलनामुळे प्रशासनाचे लक्ष या गंभीर समस्येकडे वेधले गेले असून, पुढील कारवाईकडे मजुरांचे लक्ष लागले आहे.
