पारनेर (अहिल्यानगर) प्रतिनिधी :
Parner Police Station हद्दीत घडलेल्या जबरी चोरीच्या घटनेतील आरोपीला अवघ्या २४ तासांच्या आत अटक करण्यात पोलिसांना यश आले आहे.
मिळालेल्या माहितीनुसार, दिनांक ९ एप्रिल २०२६ रोजी मौजे माजमपुर, राळेगण थेरपाळ (ता. पारनेर) येथे फिर्यादीची सासू रात्री घरात झोपलेली असताना मध्यरात्री सुमारे १२ वाजता अज्ञात चोरट्याने दरवाजा उघडून घरात प्रवेश केला. त्याने जबरदस्तीने गळ्यातील सुमारे ५० हजार रुपयांचे सोन्याचे दागिने हिसकावून पळ काढला. या प्रकरणी बीएनएस कलम ३०९(४) अन्वये गुन्हा दाखल करण्यात आला होता.
घटनेनंतर पोलीस निरीक्षक संतोष खेडकर यांच्या मार्गदर्शनाखाली गुन्हे शोध पथकाने तात्काळ तपास सुरू केला. गुप्त माहितीच्या आधारे आरोपी अशोक भाऊसाहेब आढाव (वय २६, रा. माजमपुर, ता. पारनेर) याचा शोध घेण्यात आला. पोलिसांनी पिंपळनेर शिवारात पाठलाग करून त्याला अटक केली.
आरोपीकडून चोरीस गेलेल्या सोन्यापैकी सुमारे ३० हजार रुपये किमतीचे दागिने जप्त करण्यात आले आहेत. न्यायालयाने आरोपीस ६ दिवसांची पोलीस कोठडी सुनावली असून पुढील तपास सुरू आहे.
ही कारवाई पोलीस अधीक्षक सोमनाथ घार्गे, अपर पोलीस अधीक्षक वैभव कलुबर्मे, उपविभागीय पोलीस अधिकारी शिरीष वमने यांच्या मार्गदर्शनाखाली करण्यात आली. तसेच ग्रेड पोसई मारुती कोळपे व इतर पोलीस कर्मचाऱ्यांनी या कारवाईत मोलाचे योगदान दिले.
