शहादा,दि.१७ (प्रतिनिधी)
येथील महाराष्ट्र राज्य परिवहन मंडळाच्या शहादा आगारात सन २०२६ चा शिव, शाहू, फुले, आंबेडकर संयुक्त जयंती महोत्सव अत्यंत उत्साहात आणि सामाजिक बांधिलकी जपत साजरा करण्यात आला. या महोत्सवाचे औचित्य साधून भव्य रक्तदान शिबिर आणि भारतीय संविधानाच्या प्रतींचे वाटप मान्यवरांच्या हस्ते करण्यात आले.
कार्यक्रमाचे उद्घाटन आमदार राजेश पाडवी यांच्या हस्ते करण्यात आले. यावेळी प्रमुख अतिथी म्हणून माजी पंचायत समिती सदस्य चंदन पानपाटील, युवा व्याख्याते सचिन पानपाटील, प्रमुख मार्गदर्शक दादाभाई पिंपळे, रघुनाथ बळसाने, अपंग महासंघाचे जिल्हाध्यक्ष राजाभाऊ कुवर, भडगावचे पोलीस पाटील धनराज पानपाटील आणि ब्ल्यू टायगर ग्रुपचे अध्यक्ष संजू दादा पानपाटील उपस्थित होते. आगार व्यवस्थापक हरीश भोई व स्थानक प्रमुख पी. जी. पाटील यांनी प्रशासकीय स्तरावर मोलाचे सहकार्य केले.केवळ उत्सव साजरा न करता समाजासाठी काहीतरी देणं लागतं, या भावनेतून आयोजित रक्तदान शिबिराला तरुणांचा उत्स्फूर्त प्रतिसाद लाभला.
तसेच, महापुरुषांचे विचार घरोघरी पोहोचावेत या उद्देशाने उपस्थित नागरिकांना व कर्मचाऱ्यांना संविधानाच्या प्रतींचे वाटप करण्यात आले. यावेळी प्रमुख मार्गदर्शकांनी महापुरुषांच्या जीवनावर आणि कार्यावर प्रकाश टाकला.हा सोहळा यशस्वी करण्यासाठी उत्सव समितीचे अध्यक्ष प्रमोद मोरे यांच्या नेतृत्वाखाली तात्याभाऊ निकम, संतोष आगळे, हर्षल निकुंभ, देवेंद्र पानपाटील, संदीप पाटील, रतीलाल पानपाटील, नंदशेखर बाविस्कर, कैलास पाटील, नितीन कोळी, मकसूद खान, हरिश्चंद्र सोनवणे, मयूर शिवदे, बापू कोळी, किशोर कोळी, रवींद्र डोडीस, प्रकाश धनगर, प्रवीण भामरे आणि प्रणिल ठाकरे यांनी परिश्रम घेतले.या कार्यक्रमात महिला प्रतिनिधी आरती जोशी, सुनिताताई कुवर, रंजना कोळी, कविता सुरळकर आणि सुवर्णा पाटील यांचाही सक्रिय सहभाग दिसून आला. कार्यक्रमाचे सूत्रसंचालन श्याम महिंद्रे यांनी केले. या संयुक्त जयंती महोत्सवामुळे परिसरात एकतेचे आणि वैचारिक प्रबोधनाचे वातावरण निर्माण झाले होते.
