शहादा,दि.१६ (प्रतिनिधी)
शहरातील जुन्या खेतिया रस्त्यालगत असलेल्या मेमन जिन कंपाऊंड परिसरातील बागवान जमातखाण्याजवळील रस्त्यावरील अतिक्रमण अखेर पालिकेने भुईसपाट केले आहे. गेल्या अनेक दिवसांपासून चर्चेत असलेल्या या कारवाईमुळे ६ मीटर रुंदीच्या रस्त्याने मोकळा श्वास घेतला असून पालिकेच्या या धडक कारवाईने अतिक्रमणधारकांचे धाबे दणाणले आहेत.
याबाबत अधिक माहिती अशी,मेमन जिन कंपाऊंड परिसरात माजी उपनगराध्यक्ष शेख जहीर शेख मुशीर व त्यांच्या शेजारील प्लॉट धारकाने ६ मीटरच्या सार्वजनिक रस्त्यावर भिंत बांधून व लोखंडी गेट बसवून अतिक्रमण केले होते. रस्ता अडवला गेल्याने रहिवाशांची मोठी गैरसोय होत होती. या बेकायदेशीर अतिक्रमणाविरोधात पालिकेचे माजी नगरसेवक व गटप्रमुख प्रा. मकरंद पाटील यांनी मुख्याधिकारी आणि जिल्हा प्रशासनाकडे सातत्याने पत्रव्यवहार करून पाठपुरावा केला होता.पालिका प्रशासनाकडून कारवाईला विलंब होत असल्याने प्रा. मकरंद पाटील यांनी आमरण उपोषणाचा इशारा दिला होता. याची दखल घेत पालिका प्रशासनाने संबंधित अतिक्रमणधारकांना दि.१६ एप्रिल रोजी कारवाई करण्याची नोटीस बजावली होती. कारवाईच्या भीतीने संबंधित घरमालकाने काल दि. १५ रोजी स्वतःहून लोखंडी गेट काढले होते,
मात्र पालिका प्रशासनाने केवळ गेट नाही तर पूर्ण बांधकाम हटवण्याची भूमिका घेतली.मुख्याधिकारी साजिद पिंजारी व इंजिनिअर संदीप सूर्यवंशी यांच्या मार्गदर्शनाखाली अतिक्रमण निर्मूलन पथक घटनास्थळी दाखल झाले. पथकाने थेट अतिक्रमित बांधकामावर हातोडा चालवून पूर्ण रस्ता मोकळा केला.सार्वजनिक रस्ते हे नागरिकांच्या सुविधेसाठी आहेत. त्यावर झालेले कोणतेही अतिक्रमण खपवून घेतले जाणार नाही. नियमानुसार ही कारवाई करण्यात आली आहे असे पालिका प्रशासनाने स्पष्ट केले आहे.
*आता शहरवासीयांचे लक्ष ‘या’ अतिक्रमणांकडे–
बागवान जमातखाण्याजवळील कारवाईनंतर आता शहरातील इतर भागांतील अतिक्रमणांचा प्रश्न ऐरणीवर आला आहे. विशेषत: यशोधन कॉलनी परिसरात रस्त्यावरील चॅनल गेटचे अतिक्रमण,शहादा पीपल्स बँक मुख्य इमारत, स्टेट बँक चौक.बस स्थानक परिसर, नगरपालिका परिसर, पंचायत समिती आणि प्रेस मारुती परिसर,जुना मोहिदा रोड, गरीब नवाज कॉलनी आणि पाडळदा रोड चौफुली या भागातील कच्ची आणि पक्की अतिक्रमणे पालिका प्रशासन आता कधी काढणार याकडे संपूर्ण शहादा शहरवासीयांचे लक्ष लागले आहे.
