पनवेल/कळंबोली(ता. प्रतिनिधी):-
कळंबोली परिसरातील वाढती लोकसंख्या आणि आरोग्य सुविधांची कमतरता लक्षात घेता सेक्टर ५ई, प्लॉट क्र. ९ येथे आधुनिक व सुसज्ज रुग्णालय उभारण्याचा महत्त्वपूर्ण प्रस्ताव पुढे आला आहे. उपमहापौर प्रमिला रविनाथ पाटील यांनी याबाबत पनवेल महानगरपालिकेकडे प्रस्ताव सादर केला होता. त्यानंतर वैद्यकीय आरोग्य विभागाने या प्रस्तावावर सकारात्मक प्रतिसाद देत पुढील कार्यवाही सुरू केली आहे.
कळंबोली परिसर न झपाट्याने विकसित होत असून येथे न लोकसंख्या मोठ्या प्रमाणात वाढत आहे, मात्र अद्ययावत आणि सर्व सुविधा असलेले रुग्णालय उपलब्ध नसल्यामुळे नागरिकांना उपचारासाठी दूर जावे लागते. यामुळे वेळ व आर्थिक खर्च वाढत असल्याची बाब न अधोरेखित करण्यात आली आहे.
प्रस्तावित रुग्णालयात आपत्कालीन सेवा, आयसीयू व एनआयसीयू सुविधा, प्रसूती व स्त्रीरोग विभाग, बालरोग विभाग, जनरल व स्पेशालिटी ओपीडी तसेच
आधुनिक डायग्नोस्टिक सेंटर अशा विविध सुविधा उपलब्ध करून देण्याची योजना आहे. या प्रकल्पामुळे स्थानिक नागरिकांना जलद, दर्जेदार आणि परवडणारी आरोग्य सेवा मिळणार असून परिसराच्या सर्वांगीण विकासालाही चालना मिळेल.
दरम्यान, महापालिकेच्या आरोग्य विभागाने दिलेल्या पत्रानुसार यापूर्वी कोविड काळात कळंबोली येथील डीसीएच रुग्णालय बंद केल्यानंतर त्या इमारतीचा वापर संसर्गजन्य आजारांवरील उपचारासाठी करण्याचा प्रस्ताव ठेवण्यात आला आहे. या अंतर्गत ऑक्सिजन बेड्स व आयसीयू बेड्ससह ‘इन्फेक्शस डिसीज हॉस्पिटल’ उभारण्याची योजना आहे. या रुग्णालयात स्वाईन फ्लू, मलेरिया, डेंग्यू, कोविड-१९, मिजल्स, हिपॅटायटिस बी, टायफॉईड, चिकनपॉक्स, निमोनिया आदी आजारांवर उपचार करण्यात येणार आहेत.
पनवेल महानगरपालिका क्षेत्रातील नागरिकांसाठी प्रसूती सेवेसाठी स्वतंत्र मातृत्व व बाल रुग्णालय उभारण्याचाही प्रस्ताव आहे. या रुग्णालयात बाह्यरुग्ण विभाग, आंतररुग्ण विभाग, अतिदक्षता विभाग, महिला वॉर्ड, नवजात अतिदक्षता कक्ष, शस्त्रक्रिया विभाग, प्रयोगशाळा, एक्स-रे विभाग, रक्तपेढी आदी सुविधा उपलब्ध राहणार आहेत.
या सर्व प्रस्तावांमुळे कळंबोली व पनवेल परिसरातील आरोग्य व्यवस्थेत मोठी सुधारणा होण्याची अपेक्षा आहे. नागरिकांना स्थानिक पातळीवरच अत्याधुनिक आरोग्य सुविधा मिळाल्यास त्याचा थेट फायदा सर्वसामान्यांना होईल, असे उपमहापौर प्रमिला पाटील यांनी म्हटले आहे.
