🚧 अर्धवट रस्त्यामुळे अपघातांची मालिका; नागरिकांमध्ये संताप

मानवत येथील मानवत बसस्थानक ते रोडे कॉलनी मार्गावर सुरू असलेल्या रस्त्याच्या अर्धवट कामामुळे अपघातांची मालिका सुरूच असल्याची गंभीर बाब समोर आली आहे.

गेल्या जवळपास सहा महिन्यांपासून या रस्त्याचे काम सुरू असले तरी ते अद्याप पूर्ण झालेले नाही, अशी तक्रार नागरिकांकडून केली जात आहे. रस्त्यावर मोठ्या प्रमाणात खड्डे आणि खडी साचल्याने वाहनचालकांना मोठ्या अडचणींचा सामना करावा लागत आहे. विशेषतः दुचाकी वाहनं घसरून पडण्याच्या घटना वारंवार घडत आहेत.

स्थानिकांच्या म्हणण्यानुसार, अनेक मोटरसायकलस्वार स्लीप होऊन जखमी झाले असून काहींना हात-पाय फ्रॅक्चर झाल्याच्या घटना घडल्या आहेत. महिलादेखील गाडीवरून पडल्याच्या घटना घडल्या आहेत. आजही अशाच प्रकारे एक मोटरसायकल खड्ड्यात जाऊन पडल्याची घटना घडली.

या रस्त्याच्या कामाकडे संबंधित कंत्राटदार आणि प्रशासन दुर्लक्ष करत असल्याचा आरोप नागरिक करत आहेत. “एखादा जीव गेल्यानंतरच का काम पूर्ण होणार?” असा संतप्त सवाल नागरिकांकडून उपस्थित केला जात आहे.

मानवत शहरात येण्यासाठी ग्रामीण भागातून हा एक महत्त्वाचा मुख्य मार्ग असून अनेक खेडी याच रस्त्याने तालुक्याशी जोडलेली आहेत. त्यामुळे या रस्त्याचे काम तातडीने पूर्ण करून नागरिकांची सुरक्षितता सुनिश्चित करावी, अशी जोरदार मागणी करण्यात येत आहे.