अक्राणी प्रतिनिधी : ज्या पद्धतीने तत्कालीन जिल्हाधिकारी नंदुरबार बालाजी मंजुळे जमिन गैरव्यवहार प्रकरणी श्रीमती मित्ताली सेठी जिल्हाधिकारी नंदुरबार यांनी ८ अधिकारी यांना निलंबित केले व ४ सेवानिवृत्तांवर कारवाई प्रस्तावित केली आहे,त्याच पद्धतीने भूमाफिया तथा आमदार चंद्रकांत बटेसिंग रघूवंशी यांनी नंदुरबार येथील आदिवासींची जमीन, गुरू चरण,देवस्थान जमीन,इनामी जमीन,कुळ कायदा जमीन, शासकीय जमीन,महार वतन जमीन इत्यादी जमिनी बेकायदेशीर, अवैध रित्या हडप केल्या प्रकरणी चौकशी करून कारवाई करावी, अशी मागणी बिरसा फायटर्स नंदुरबार संघटनेकडून जिल्हाधिकारी नंदुरबार श्रीमती मित्ताली सेठी यांच्या कडे एका निवेदनाद्वारे करण्यात आली आहे
यावेळी बिरसा फायटर्सचे राज्याध्यक्ष गोपाल भंडारी, राष्ट्रीय कोषाध्यक्ष पप्पू अवाया, जगदीश डुडवे सह १० कार्यकर्ते उपस्थित होते.
निवेदनात म्हटले आहे की,तत्कालीन जिल्हाधिकारी नंदुरबार बालाजी मंजुळे जमिन गैरव्यवहार प्रकरणी आपण ८ अधिकारी यांना निलंबित व ४ सेवानिवृत्तांवर कारवाई प्रस्तावित करून चांगले काम केले.याबद्धल तुमचे मनापासून अभिनंदन! भूमाफिया तथा आमदार चंद्रकांत बटेसिंग रघूवंशी यांनी नंदुरबार येथील आदिवासींची जमीन, गुरू चरण,देवस्थान जमीन,इनामी जमीन,कुळ कायदा जमीन, शासकीय जमीन,महार वतन जमीन इत्यादी जमिनी बेकायदेशीर, अवैध रित्या हडप केल्याची चौकशी करून कारवाई करणेबाबतचे निवेदन आपणास दिनांक २५ मार्च २०२५ रोजी आदिवासी संघटनांनी दिले होते.
त्यानंतर जिल्हाधिकारी नंदुरबार यांनी विभागीय आयुक्त नाशिक यांना दिनांक १७/०९/२०२५ रोजी पाठवलेले आहे.
आदिवासी संघटनांनी निवेदन देऊन १ वर्षे पूर्ण होत आहेत.तरी अद्याप अवैध जमीनीची चौकशी करण्यात आली नाही,ही अत्यंत गंभीर बाब आहे. भूमाफिया चंद्रकांत रघुवंशी यांनी केलेल्या जमिन गैरव्यवहार प्रकरणी आपण कोणत्याच प्रकारची कार्यवाही करीत नसल्यामुळे आपल्यावर आमचा अविश्वास निर्माण होत आहे.भूमाफिया चंद्रकांत रघुवंशी वर आपण कारवाई करीत नसल्यामुळे लोकांमध्ये आपल्या कारभाराबद्दल अविश्वास निर्माण होऊन माननीय जिल्हाधिकारी महोदया ह्या राजकीय पुढाऱ्यांच्या दबावाखाली जमिन गैरव्यवहार प्रकरणी आमदार चंद्रकांत रघुवंशी यांना वाचविण्यासाठी काम करत आहेत,असा संदेश जात आहे. सदर जमिनींची चौकशी होऊन सदर जमिनी सरकार जमा न झाल्या पाहिजेत.अशी मागणी बिरसा फायटर्स नंदुरबार संघटनेकडून जिल्हाधिकारी नंदुरबार यांच्या कडे करण्यात आली आहे.
