शहादा,दि.१७(प्रतिनिधी)
शहादा नगर परिषदेची तिसरी सर्वसाधारण सभा दि.१७ एप्रिल रोजी दुपारी पालिकेच्या सभागृहात संपन्न झाली. दुपारी साडेतीन वाजता सुरू झालेली ही सभा तीन तासापावेतो कधी तणावपूर्ण तर कधी खेळीमेळीच्या वातावरणात पार पडली. या सभेत विषय पत्रिकेवरील एकूण ६४ विषयांपैकी १० विषय नामंजूर अथवा स्थगित करण्यात आले तर उर्वरित विषयांना बहुमताने मंजुरी देण्यात आली.
पालिकेच्या सभागृहात संपन्न झालेल्या सभेच्या अध्यक्षस्थानी लोकनियुक्त नगराध्यक्ष अभिजीत पाटील होते. यावेळी व्यासपीठावर उपनगराध्यक्ष सौ. माधवी मकरंद पाटील व मुख्याधिकारी साजिद पिंजारी यांची प्रमुख उपस्थिती होती. या सभेला विविध विषय समित्यांचे सभापती, प्रतोद, सर्व नगरसेवक आणि विविध विभागांचे प्रमुख अधिकारी उपस्थित होते.
सभेच्या सुरुवातीपासूनच अनेक विषयांवर जोरदार चर्चा झाली. विशेषतः बांधकाम सभापती संतोष वाल्हे हे अत्यंत आक्रमक भूमिकेत दिसून आले. त्यांनी आपला निषेध व्यक्त करण्यासाठी नगराध्यक्षांच्या दिशेने काळीपट्टी भिरकावली. मात्र, नगराध्यक्ष अभिजीत पाटील यांनी अत्यंत शांत आणि संयमी भूमिका घेत सभेचे कामकाज पुढे चालू ठेवले.सभेत झालेल्या चर्चेत उपनगराध्यक्ष सौ. माधवी पाटील, भाजपा प्रतोद ज्ञानेश्वर चौधरी, संतोष वाल्हे, ललित छाजेड, सागर मराठे, प्रदीप ठाकरे, मुनेशचंद्र जगदेव, दीपक कोळी, वसीम तेली, एडवोकेट दानिश पठाण आदींनी सहभाग नोंदवून आपली मते मांडली.या सभेत जे विषय नामंजूर किंवा स्थगित करण्यात आले त्यात प्रामुख्याने खासदार गोवाल पाडवी यांनी सुचविलेल्या नगरपालिका शाळा क्रमांक पाच येथील भौतिक सुविधा पुरविणे, पालिकेच्या अभिलेख विभागातील दप्तर अ ब क ड प्रमाणे वर्गीकरण करणे, घनकचरा व्यवस्थापन बायोमायनिंग करणे, जुने मंगळ बाजार येथील अहुजा मेडिकल व नहाटा स्टोर्स या जागेत बांधकाम करणे, आरक्षण क्रमांक २१ वरील गाळेधारकांना मुदतवाढ देणे, त्याच आरक्षण जागेवर वरच्या मजल्यावर जाण्यासाठी लोखंडी जिना तयार करणे, स्वच्छता विभागासाठी खुर्च्या खरेदी करणे, जुन्या भाजी मार्केटच्या जागेवर सुसज्ज संकुल बांधणे, विविध साहित्य खरेदीसाठी ठेकेदारास मुदतवाढ देणे आणि कुकडेल शिवार सर्वे नंबर २४६ या जागेवर कंपाऊंड करणे या विषयांचा समावेश आहे.
हे विषय पुढील बैठकीत घेण्याची सूचना करण्यात आली आहे.आरोग्य व स्वच्छता विभागाच्या विषयावर बोलतांना आरोग्य सभापती सुनील पाटील यांनी संबंधित विभागातील अधिकारी व कर्मचारी योग्य माहिती देत नसल्याची तक्रार करत यावर सखोल चर्चा व्हावी अशी अपेक्षा व्यक्त केली. तसेच वाचनालयातील ८० खुर्च्यांपैकी ६० खुर्च्या कुठे गेल्या, यावरूनही सभागृहात बरीच चर्चा झडली. पालिकेचे काही कर्मचारी स्वतःच वेगवेगळ्या विभागातील कामे घेत असल्याचा गंभीर आरोप करत संबंधित कर्मचाऱ्यांवर कायदेशीर कारवाई करण्याची मागणी सदस्यांनी केली.
आयत्या वेळच्या विषयांमध्ये मुनेशचंद्र जगदेव यांनी पालिकेस शहादा-कुकडेल असे नाव देण्याची मागणी केली, तर स्वीकृत नगरसेवक कल्पेश पटेल यांनी डोंगरगाव रस्त्यास स्वामीनारायण मार्ग असे नामकरण करण्याचा प्रस्ताव सादर केला.नगराध्यक्ष अभिजीत पाटील यांनी शेवटी सर्व विभागांच्या अधिकाऱ्यांना निर्देश दिले की, त्यांनी सभागृहात आणि नगरसेवकांना परिपूर्ण माहिती उपलब्ध करून द्यावी. तसेच कर्मचाऱ्यांबाबत मुख्याधिकाऱ्यांनी कायदेशीर तरतुदी तपासून योग्य तो निर्णय घ्यावा असे सुचविले. उपनगराध्यक्ष सौ. माधवी पाटील यांनीही अधिकारी व कर्मचाऱ्यांनी अद्ययावत माहिती ठेवावी आणि नगरसेवकांच्या प्रश्नांना कायदेशीर व व्यवस्थित उत्तरे द्यावीत, अशी सूचना केली.सभेचे सूत्रसंचालन कार्यालय अधीक्षक दिलीप वसावे यांनी केले, तर आभार मुख्याधिकारी साजिद पिंजारी यांनी मानले.
