🌧️ मुंगशी परिसरात अवकाळी पावसाचा फटका; शेतकऱ्यांचे मोठे नुकसान

मुंगशी येथे दिनांक १७ एप्रिल २०२६ रोजी सायंकाळी पाच ते सहा वाजण्याच्या दरम्यान तुफान वाऱ्यासह जोरदार अवकाळी पाऊस झाला. या पावसामुळे परिसरातील शेतकरी आणि नागरिकांचे मोठ्या प्रमाणात नुकसान झाले आहे.

बार्शी तालुक्यातील ढोराळे, दहिटणे, सासुरे, राळेरास, तडवळे, यावली आदी गावांमध्ये या अवकाळी पावसाचा तडाखा बसला. जोरदार वाऱ्यामुळे अनेक घरांवरील पत्रे उडून गेली, तसेच जनावरांच्या निवाऱ्यांचेही नुकसान झाले.

विशेषतः द्राक्षांपासून तयार होणाऱ्या बेदाण्याचे मोठे नुकसान झाले आहे. बेदाणे सुकवण्यासाठी टाकलेली पत्रे व कागद उडून गेल्याने बेदाणे भिजले असून त्यामुळे त्यांचा रंग काळा पडण्याची शक्यता आहे. परिणामी बाजारात त्यांना कमी दर मिळण्याची भीती व्यक्त होत आहे.

या अवकाळी पावसामुळे शेतकरी आर्थिक संकटात सापडला असून प्रशासनाने तात्काळ पंचनामा करून नुकसानभरपाई द्यावी, अशी मागणी होत आहे.