कडेगाव :
नेवरी (ता. कडेगाव, जि. सांगली) येथील जिल्हा परिषद प्राथमिक शाळेत नेवरी मंडळातील १३ गावांसाठी आयोजित ‘छत्रपती शिवाजी महाराज महाराजस्व अभियान समाधान शिबीर’ अत्यंत उत्साहात व यशस्वीपणे पार पडले. शासनाच्या विविध योजनांचा लाभ ‘एक खिडकी’ प्रणालीद्वारे ग्रामस्थांना एकाच छताखाली उपलब्ध करून देण्यात आला.
या शिबिराचे उद्घाटन कडेगाव पंचायत समितीचे उपसभापती
डॉ.विजय महाडीक यांच्या हस्ते तसेच सर्व सरपंचांच्या उपस्थितीत झाले. यावेळी उपविभागीय अधिकारी रणजित भोसले, तहसीलदार अजित शेलार,
नवरीच्या सरपंच प्रमिला साळुंखे ,मंडळ अधिकारी, ग्राम महसूल अधिकारी तसेच विविध विभागांचे अधिकारी-कर्मचारी
नेवरी मंडळ मधील सर्व सरपंच ग्रामस्थ मोठ्या संख्येने उपस्थित होते.
शिबिरात महसूल विभागाच्या १५ प्रकारच्या सेवा व विविध शासकीय योजनांचा लाभ प्रत्यक्ष ठिकाणी देण्यात आला. यामध्ये दाखले वितरण, ७/१२ उतारा दुरुस्ती, जिवंत ७/१२, पीएम किसान, अॅग्रीस्टॅक, कृषी योजना, संजय गांधी निराधार योजना, इंदिरा गांधी पेन्शन योजना, रोजगार हमी योजना यांचा समावेश होता. तसेच ग्रामविकास, वन विभाग, आरोग्य, महिला व बालकल्याण, सेतू केंद्र व पुरवठा विभाग यांनीही प्रभावी सहभाग नोंदविला.
या शिबिरात एकूण 1887 दाखले वाटप, 1058 फेरफार प्रकरणे निकाली, 201 प्रलंबित फेरफार निर्गत, 30 सातबारा दुरुस्ती, 4480 डिजिटल सातबारे, 1221 डिजिटल 8अ यांचा समावेश असून एकूण 9708 कामांची विक्रमी पूर्तता करण्यात आली.
ग्रामस्थांनी या उपक्रमास उत्स्फूर्त प्रतिसाद दिला असून प्रशासनाच्या कार्यक्षमतेचे आणि लोकाभिमुखतेचे हे ठळक उदाहरण ठरले आहे. योजनांचा लाभ थेट लाभार्थ्यांपर्यंत पोहोचविण्यात शिबिराने महत्त्वपूर्ण भूमिका बजावली.
चौकट :
…आणि थेट लाभ :
नेवरी येथे झालेल्या महाराजस्व समाधान शिबिरात 1887 दाखले वाटप, 1058 फेरफार निकाली, तसेच हजारो डिजिटल नोंदी व विविध योजनांचे लाभ प्रत्यक्ष लाभार्थ्यांना मिळाले. उपविभागीय अधिकारी रणजित भोसले व तहसीलदार अजित शेलार यांच्या मार्गदर्शनाखाली शिबिर यशस्वी ठरले.
फोटो ओळ:
नेवरी येथे आयोजित महाराजस्व समाधान शिबिरात विविध दाखल्यांचे वाटप करताना उपविभागीय अधिकारी रणजित भोसले व तहसीलदार अजित शेलार,उपसभापती डॉ विजय महाडीक आदि
