मुंबई : एसटी महामंडळ तर्फे देण्यात येणाऱ्या एनसीएमसी (NCMC) कार्डासाठी महिला व ज्येष्ठ नागरिकांची मोठी धडपड सुरू असल्याचे चित्र समोर आले आहे. या प्रक्रियेत येणाऱ्या अडचणींमुळे नागरिक त्रस्त झाले असून व्यवस्थेवर प्रश्नचिन्ह उपस्थित होत आहे.
आधार कार्ड व मोबाईलच्या सहाय्याने हे कार्ड मिळविता येते, मात्र प्रत्यक्षात अनेक अडचणी येत आहेत. आमचे प्रतिनिधी भारत कवितके यांनी रांगेत उभ्या असलेल्या ज्येष्ठ नागरिकांशी संवाद साधला असता, “मोबाईलवर ओटीपी येत नाही, नेटवर्क व सर्व्हरच्या समस्या आहेत. त्यामुळे दोन-तीन तास रांगेत उभे राहूनही निराश होऊन घरी परतावे लागते,” अशी प्रतिक्रिया त्यांनी दिली.
काही ठिकाणी अपुऱ्या शेडमुळे ज्येष्ठ नागरिकांना कडक उन्हात तासनतास उभे राहावे लागत असल्याची तक्रार आहे. “महामंडळाने हे कार्ड घरपोच पोस्टाने पाठविण्याची व्यवस्था केली असती तर अधिक सोयीचे झाले असते,” अशी मागणीही नागरिकांकडून होत आहे.
आधार कार्डवर जन्मतारीख असताना पुन्हा स्वतंत्र कार्ड काढण्याची गरज का, असा सवालही उपस्थित केला जात आहे. पारदर्शकतेच्या नावाखाली ही प्रक्रिया कितपत योग्य आहे, यावर चर्चा रंगत आहे.
दरम्यान, एसटी स्थानकांवरील मूलभूत सुविधांकडेही दुर्लक्ष होत असल्याचे दिसून येते. शौचालयांची अवस्था, बंद पंखे, अपुरी स्वच्छता, आवारातील डांबरीकरणाचा अभाव, तसेच दारुडे, गर्दुल्ले, भिकारी आणि मोकाट कुत्र्यांची वर्दळ या समस्यांकडे तातडीने लक्ष देण्याची गरज आहे.
महिला व ज्येष्ठ नागरिकांना एनसीएमसी कार्ड सहज आणि सुलभ पद्धतीने मिळावे, यासाठी एसटी महामंडळ यांनी तात्काळ उपाययोजना करून अडचणी दूर कराव्यात, अशी मागणी नागरिकांकडून होत आहे.
