धाराशिव (प्रतिनिधी) :
व्ही.पी. एज्युकेशनल कॅम्पस, छत्रपती संभाजीनगर रोड, धाराशिव येथील कृषि महाविद्यालयात १७ एप्रिल रोजी Ideal Agri Search Pvt. Ltd. या नामांकित कंपनीचा कॅम्पस इंटरव्ह्यू कार्यक्रम यशस्वीरीत्या पार पडला. या निवड प्रक्रियेत अंतिम सत्रातील ३० विद्यार्थ्यांनी सहभाग घेतला असून, त्यापैकी १३ विद्यार्थ्यांची अंतिम निवड करण्यात आली.
Ideal Agri Search Pvt. Ltd. ही कंपनी पिकांच्या आरोग्य व उत्पादनवाढीसाठी जैविक खते, सूक्ष्मअन्नद्रव्ये, वनस्पती वाढ नियंत्रक आणि पाण्यात विद्रव्य खते उपलब्ध करून देणारी अग्रगण्य संस्था आहे. खत निर्मिती क्षेत्रातही कंपनीने विशेष कामगिरी बजावली आहे.
या मुलाखती कंपनीचे डेव्हलपमेंट हेड वैभवकुमार एस. जाधव आणि रिजनल हेड प्रवीण महिंद यांच्या मार्गदर्शनाखाली पार पडल्या. निवड झालेल्या विद्यार्थ्यांमध्ये संकेत सांगुळे, ज्ञानेश्वर माळी, सौरभ मदने, अभिषेक अनुभुळे, अजय घेवारे, अभिजित घुगे, अनिकेत शेंडगे, प्रतिक्षा साखरे, दिप्ती जाधव, राजश्री पाठक, सरिता गंजे, प्रतीक्षा मस्के आणि भक्ती चौधरी यांचा समावेश आहे.
निवड झालेल्या विद्यार्थ्यांना महाराष्ट्रातील विविध जिल्ह्यांमध्ये कृषी संलग्न काम करण्याची संधी मिळणार आहे. सध्याच्या बेरोजगारीच्या पार्श्वभूमीवर महाविद्यालयाने विद्यार्थ्यांसाठी रोजगाराच्या संधी उपलब्ध करून दिल्यामुळे हा उपक्रम विशेष कौतुकास्पद ठरत आहे.
या यशाबद्दल धनेश्वरी शिक्षण समूहाचे अध्यक्ष डॉ. प्रतापसिंह पाटील व करण प्रतापसिंह पाटील यांनी विद्यार्थ्यांचे अभिनंदन करून पुढील वाटचालीसाठी शुभेच्छा दिल्या.
कार्यक्रमाच्या यशस्वी आयोजनासाठी प्राचार्य डॉ. क्रांतीकुमार पाटील, व्यवस्थापक प्रा. हरी घाडगे, प्लेसमेंट सेल प्रमुख डॉ. शेख मोहसीन यांच्यासह महाविद्यालयातील प्राध्यापक व कर्मचाऱ्यांनी मोलाची भूमिका बजावली.
