केज प्रतिनिधी :
कानडी माळी येथे घडलेल्या ट्रॅक्टर चोरी प्रकरणाचा छडा अवघ्या ४८ तासांत लावण्यात स्थानिक गुन्हे शाखेला (LCB) यश आले आहे. या प्रकरणी पायतळवाडी येथील २५ वर्षीय तरुणाला अटक करण्यात आली असून, सुमारे ५ लाख ७० हजार रुपयांचा मुद्देमाल जप्त करण्यात आला आहे.
दिनांक १५ एप्रिल २०२६ रोजी कानडी माळी येथील रहिवासी सतीश सुदाम बनसोडे यांचा ट्रॅक्टर व ट्रॉली त्यांच्या घरासमोरून अज्ञात चोरट्याने चोरून नेली होती. या घटनेनंतर केज पोलीस ठाणे येथे भारतीय न्याय संहिता (BNS) कलम ३०३(२) अन्वये गुन्हा दाखल करण्यात आला होता.
घटनेचे गांभीर्य लक्षात घेऊन स्थानिक गुन्हे शाखेने तपासाची चक्रे वेगाने फिरवत अवघ्या दोन दिवसांत आरोपीचा शोध लावला. आरोपीकडून चोरीला गेलेला ट्रॅक्टर आणि ट्रॉली जप्त करण्यात आली आहे.
पोलीस प्रशासनाच्या या जलद कारवाईमुळे नागरिकांमध्ये समाधान व्यक्त होत असून, गुन्हेगारांवर कडक कारवाई करण्याची मागणीही जोर धरत आहे.
