उरण, दि. १८ :
ओएनजीसी उरण आणि ऑल इंडिया एससी एसटी असोसिएशन उरण यांच्या संयुक्त विद्यमाने ओएनजीसीच्या प्रशासकीय इमारतीसमोरील प्रांगणात डॉ. बाबासाहेब आंबेडकर यांच्या पुतळ्याचे अनावरण सोहळा उत्साहात पार पडला.
कार्यक्रमाची सुरुवात छत्रपती शिवाजी महाराज यांच्या पुतळ्यास पुष्पहार अर्पण करून करण्यात आली. सुमारे ३५ वर्षांनंतर जुन्या पुतळ्याचे विस्थापन करून त्या जागी अधिक सुंदर व पंचधातूचा नवीन पुतळा स्थापित करण्यात आला.
ओएनजीसी उरणचे प्लांट मॅनेजर अहमद यांच्या हस्ते पुतळ्याचे अनावरण करण्यात आले. दादर येथील चैत्यभूमी येथून आलेल्या भंतेजी यांच्या उपस्थितीत पंचशील व भीम स्तुतीने कार्यक्रमाला आध्यात्मिक स्वरूप लाभले. त्यांनी डॉ. आंबेडकर यांच्या विचारांचे सखोल विवेचनही केले.
कार्यक्रमात उपस्थितांना भारताच्या संविधानाच्या प्रती भेट देण्यात आल्या. तसेच ‘भीमगाथा’ वाद्यवृंदाच्या माध्यमातून डॉ. आंबेडकर यांच्या जीवनावर आधारित नाट्य आणि गीतांचे सादरीकरण करून उपस्थितांचे मनोरंजन करण्यात आले.
या यशस्वी आयोजनासाठी एचआर हेड भावना आठवले, एचआर मॅनेजर गौरव पतंगे, आय.आर. मॅनेजर आयुष्यमान, तसेच अनिल कांबळे आणि सांची गायकवाड यांचे मोलाचे योगदान लाभले.
तसेच विष्णू व्हटकर, प्रकाश तरडे, विश्वास लोखंडे, सर्वेद्र साकेत, जादूबीर मुरमु, आशिष कांबळे, राजेश पाटील, सुशांत गायकवाड, सुपेंद्र मोहिते, किरण धोत्रे आणि अनिल होटकर यांच्यासह संपूर्ण टीमने कार्यक्रमाचे यशस्वी नियोजन केले.
समारोपावेळी विष्णू व्हटकर यांनी आभार प्रदर्शन केले. ओएनजीसी उरण आणि ऑल इंडिया एससी/एसटी एम्प्लॉईज वेलफेअर असोसिएशन यांच्या संयुक्त विद्यमाने हा सोहळा शांततेत व उत्साहपूर्ण वातावरणात पार पडला.
