पनवेल प्रतिनिधी :
पनवेल जवळील पळस्पे जेएनपीए मार्गावरील पाडेघर परिसरात असलेल्या ‘JWR’ वेअरहाऊसला शनिवारी (दि. १८) दुपारी सुमारे २.४५ वाजण्याच्या सुमारास भीषण आग लागल्याची घटना घडली.
आगीचे स्वरूप अत्यंत रौद्र होते. काळ्या धुराचे मोठे लोळ दूरवरूनही दिसत होते. वेअरहाऊसमध्ये मोठ्या प्रमाणात साठा असल्याने आग झपाट्याने पसरली आणि परिसरात भीतीचे वातावरण निर्माण झाले. सुदैवाने या घटनेत कोणतीही जीवितहानी झाल्याचे वृत्त नसले, तरी गोदामातील मोठ्या प्रमाणातील साहित्य जळून खाक झाल्याची भीती व्यक्त केली जात आहे.
आगीचे नेमके कारण अद्याप स्पष्ट झालेले नाही. आग लागल्याचे लक्षात येताच कामगारांनी तत्काळ बाहेर पळ काढल्याने मोठा अनर्थ टळला. काही काळ कामगार वर्गात भीतीचे वातावरण होते.
घटनेची माहिती मिळताच अग्निशामक दलाच्या गाड्या घटनास्थळी दाखल होऊन आगीवर नियंत्रण मिळवण्यासाठी शर्थीचे प्रयत्न सुरू आहेत.
दरम्यान, जेएनपीए बंदर परिसरात मोठ्या प्रमाणात आयात-निर्यात माल साठवणूक करणारी गोदामे आहेत. मात्र, अनेक ठिकाणी पुरेशा अग्निशमन सुविधांचा अभाव असल्याने अशा आगीच्या घटनांमध्ये वाढ होत असल्याची चिंता व्यक्त केली जात आहे.
